തിരുവനന്തപുരത്തെ നാലു ദിവസമായി തുടരുന്ന ജലവിതരണ പ്രതിസന്ധിയിൽ വാട്ടർ അതോറിറ്റിക്കെതിരെ രൂക്ഷ വിമർശനവുമായി രംഗത്തെത്തിയിരിക്കുകയാണ് വി കെ പ്രശാന്ത് എംഎൽഎ. കുടിവെള്ള പ്രശ്നത്തിൽ വാട്ടർ അതോറിറ്റിക്ക് വീഴ്ചയുണ്ടായെന്നും ഇക്കാര്യത്തിൽ മന്ത്രിക്ക് പരാതി നൽകുമെന്നും അദ്ദേഹം വ്യക്തമാക്കി. ജല അതോറിറ്റി നഗരസഭയ്ക്ക് കൃത്യമായ അറിയിപ്പ് നൽകിയില്ലെന്നും എങ്ങനെയാണ് ഈ സാഹചര്യമുണ്ടായതെന്ന് പരിശോധിക്കണമെന്നും പ്രശാന്ത് ആവശ്യപ്പെട്ടു.
പ്രശ്നം ഉടൻ പരിഹരിക്കുമെന്നും 50 ടാങ്കറുകളിൽ വെള്ളം എത്തിക്കുന്നുണ്ടെന്നും എംഎൽഎ അറിയിച്ചു. ഗുരുതരമായ ബുദ്ധിമുട്ടാണുണ്ടായതെന്നും ഫോൺ വിളിക്കുന്നവരുടെ നമ്പർ കുറിച്ചെടുത്ത് ടാങ്കറുകൾ എത്തിക്കാനുള്ള ക്രമീകരണങ്ങൾ ഒരുക്കുന്നുണ്ടെന്നും അദ്ദേഹം കൂട്ടിച്ചേർത്തു. തിരുവനന്തപുരം പോലുള്ള വലിയ നഗരത്തിൽ ജല വിതരണത്തിന് അനുഭവസ്ഥരായ ഉദ്യോഗസ്ഥരെ വയ്ക്കണമെന്നും പ്രശാന്ത് അഭിപ്രായപ്പെട്ടു.
കൃത്യമായ ജാഗ്രതയുണ്ടാകണമായിരുന്നുവെന്ന് ചൂണ്ടിക്കാട്ടിയ എംഎൽഎ, നേമത്ത് പണി നടക്കുമ്പോൾ നഗരത്തിൽ മൊത്തം വെള്ളം മുട്ടിക്കേണ്ട സാഹചര്യമില്ലെന്നും വ്യക്തമാക്കി. രണ്ടോ മൂന്നോ വാൽവുകൾ അടച്ച് അഞ്ചോ ആറോ വാർഡുകളിൽ മാത്രം വെള്ളം മുടങ്ങുകയുള്ളൂവെന്നും വി കെ പ്രശാന്ത് കൂട്ടിച്ചേർത്തു. നഗരം മുഴുവൻ കുടിവെള്ളം മുടങ്ങുന്ന സാഹചര്യമെങ്ങനെയുണ്ടായിയെന്ന് പരിശോധിക്കപ്പെടണമെന്നും അദ്ദേഹം ആവശ്യപ്പെട്ടു.
Story Highlights: V K Prasanth MLA criticizes Kerala Water Authority over water distribution crisis in Thiruvananthapuram
