വയനാട് ദുരന്തത്തിൽ കുടുംബം നഷ്ടപ്പെട്ട നൈസയുടെ വിദ്യാഭ്യാസ ചെലവ് ഏറ്റെടുക്കാൻ നടൻ വിനോദ് കോവൂർ

വയനാട് ദുരന്തത്തിൽ അച്ഛനും സഹോദരങ്ങളും നഷ്ടപ്പെട്ട കുഞ്ഞുനൈസയുടെ വിദ്യാഭ്യാസ ചെലവുകൾ ഏറ്റെടുക്കാൻ തയ്യാറാണെന്ന് നടൻ വിനോദ് കോവൂർ പ്രഖ്യാപിച്ചു. ട്വന്റി ഫോർ സംഘടിപ്പിച്ച ‘എന്റെ കുടുംബം വയനാടിന് ഒപ്പം’ എന്ന പരിപാടിയിലാണ് താരം ഇക്കാര്യം അറിയിച്ചത്. നൈസ എത്ര വരെ പഠിക്കുന്നുവോ അത്രയും കാലത്തെ എല്ലാ പഠന ചെലവുകളും താൻ നിർവഹിക്കുമെന്ന് വിനോദ് കോവൂർ ട്വന്റി ഫോർ ജില്ലാ സമ്മേളന വേദിയിൽ പറഞ്ഞു. കുടുംബം ഇക്കാര്യത്തിൽ തീരുമാനമെടുത്ത് അറിയിച്ചാൽ ഇന്നു മുതൽ നൈസ തനിക്ക് പ്രിയപ്പെട്ടവളാകുമെന്നും അദ്ദേഹം കൂട്ടിച്ചേർത്തു.

നൈസയെ ആദ്യം കണ്ടതിനുശേഷം നിരവധി പേർ വിളിച്ച് അവളുടെ കാര്യം അന്വേഷിച്ചതായി വിനോദ് പറഞ്ഞു. നൈസ തന്നെ ‘മൂസാക്കായി’ എന്നാണ് വിളിക്കുന്നതെന്നും, ഇത്ര ചെറിയ കുട്ടിയുടെ മനസ്സിൽ ആ കഥാപാത്രം ഉണ്ടെന്നതിൽ സന്തോഷമുണ്ടെന്നും അദ്ദേഹം കൂട്ടിച്ചേർത്തു. വെള്ളാർമല സ്കൂൾ റോഡിലെ വീട്ടിലുണ്ടായിരുന്ന ഏഴ് പേരിൽ ഇപ്പോൾ അവശേഷിക്കുന്നത് മൂന്ന് വയസുകാരിയായ നൈസയും അമ്മ ജമീലയും മാത്രമാണ്. ഉപ്പയും സഹോദരങ്ങളുമടക്കം ഉറ്റവരെയെല്ലാം ദുരന്തം കവർന്നു.

വയനാട് സന്ദർശനത്തിനിടെ പ്രധാനമന്ത്രി നരേന്ദ്രമോദിയുടെ മനം കവർന്ന നൈസ ദേശീയ മാധ്യമങ്ങളിലും സോഷ്യൽ മീഡിയയിലും നിറഞ്ഞ് രാജ്യത്തിന്റെ ഓമനയായി മാറിയിരുന്നു. മോദിയെ കെട്ടിപ്പിടിച്ചു ചിരിച്ചു നിൽക്കുന്ന നൈസയുടെ മുഖം വയനാട്ടിലെ ജനതയുടെ അതിജീവനത്തിന്റെ പ്രതീകമായി മാറി. നഷ്ടപ്പെടലുകളുടെ വേദനകൾ അറിയാത്ത പ്രായത്തിൽ അവൾ വീണ്ടും കളിചിരികളിലേക്ക് മടങ്ങുകയാണ്. ട്വന്റി ഫോർ പ്രക്ഷകരുടെ ജില്ലാ സമ്മേളനത്തിന്റെ ഭാഗമായി 24 കണക്ടുമായി സഹകരിച്ചാണ് ഉരുൾപൊട്ടൽ ദുരന്തമുണ്ടായ വയനാട് ചൂരൽമല, മുണ്ടക്കൈ നിവാസികൾക്ക് കൈത്താങ്ങാകാൻ ‘എന്റെ കുടുംബം വയനാടിനൊപ്പം’ എന്ന പരിപാടി സംഘടിപ്പിച്ചത്.

Story Highlights: Actor Vinod Kovoor offers to bear education expenses of Nysa, a Wayanad landslide survivor