സിനിമാ മേഖലയിലെ പ്രശ്നങ്ങൾ ചർച്ച ചെയ്യാൻ സംസ്ഥാന സർക്കാർ സംഘടിപ്പിക്കുന്ന കോൺക്ലേവ് നവംബർ 23ന് നടക്കാൻ സാധ്യതയില്ല. നിലവിലെ പ്രതിഷേധങ്ങളിൽ കോടതി എന്ത് നിലപാട് സ്വീകരിക്കുന്നു എന്നതിനെ ആശ്രയിച്ചിരിക്കും കോൺക്ലേവിന്റെ നടത്തിപ്പ്. സംഘടനകൾ തമ്മിലുള്ള ചർച്ചകൾ അനിവാര്യമാണെന്നും സമവായത്തിലെത്തിയ ശേഷം മാത്രമേ കോൺക്ലേവ് നടത്തൂ എന്നുമാണ് സർക്കാരിന്റെ നിലപാട്.
ഹേമ കമ്മിറ്റി റിപ്പോർട്ട് പുറത്തുവന്നതിനു ശേഷമുണ്ടായ വിവാദങ്ങളുടെ പശ്ചാത്തലത്തിലാണ് ഈ തീരുമാനം. ആരോപണം നേരിടുന്ന നടൻ മുകേഷിനെ സമിതിയിൽ നിന്ന് ഒഴിവാക്കാനുള്ള സാധ്യതയുണ്ട്. എന്നാൽ, ഇക്കാര്യത്തിൽ സർക്കാരിന്റെയോ പാർട്ടിയുടെയോ ഔദ്യോഗിക തീരുമാനം ഇതുവരെ ഉണ്ടായിട്ടില്ല. നേരത്തേ തന്നെ നടി മഞ്ജു വാര്യരും ഛായാഗ്രാഹകൻ രാജീവ് രവിയും സമിതിയിൽ നിന്ന് പിന്മാറിയിരുന്നു.
ഗോവ അന്താരാഷ്ട്ര ചലച്ചിത്രോത്സവം നടക്കുന്നതിനാൽ നവംബർ 23 മുതൽ നടത്താനിരുന്ന സിനിമാ കോൺക്ലേവിന്റെ തീയതിയിൽ മാറ്റമുണ്ടാകും. നവംബർ 20 മുതൽ 28 വരെ നടക്കുന്ന മേളയ്ക്കു ശേഷം കോൺക്ലേവ് സംഘടിപ്പിക്കുന്നതാണ് ഇപ്പോൾ പരിഗണനയിലുള്ളത്. സിനിമാ മേഖലയിലെ വിവിധ സംഘടനകൾ തമ്മിലുള്ള ചർച്ചകൾക്കും സമവായത്തിനും ശേഷം മാത്രമേ കോൺക്ലേവ് നടത്തുകയുള്ളൂ എന്ന നിലപാടിലാണ് സർക്കാർ.
Story Highlights: Kerala government’s cinema conclave likely to be postponed due to ongoing controversies and court interventions
