ഇന്ന് രാജ്യം ആദ്യ ദേശീയ ബഹിരാകാശദിനം ആഘോഷിക്കുകയാണ്. ചന്ദ്രനിൽ പേടകമിറക്കി സാങ്കേതിക കരുത്ത് തെളിയിച്ചതിന്റെ ഓർമ്മ പുതുക്കാനായി വിവിധ പരിപാടികൾ സംഘടിപ്പിച്ചിരിക്കുന്നു. ഡൽഹിയിലെ ഭാരത് മണ്ഡപത്തിൽ നടക്കുന്ന ചടങ്ങുകളിൽ രാഷ്ട്രപതി ദൗപതി മുർമു മുഖ്യാതിഥിയായിരിക്കും. ചന്ദ്രയാൻ പദ്ധതിയുടെ ഭാഗമായി പ്രവർത്തിച്ച ശാസ്ത്രജ്ഞരെയും മറ്റുള്ളവരെയും ഈ യോഗത്തിൽ ആദരിക്കും.
2023 ആഗസ്റ്റ് 23-നാണ് ഐ.എസ്.ആർ.ഒ.യുടെ ചന്ദ്രയാൻ-3ലെ വിക്രം ലാൻഡർ ചന്ദ്രന്റെ ദക്ഷിണധ്രുവത്തിൽ ഇറങ്ങിയത്. ലാൻഡറിലെ വിജ്ഞാൻ റോവർ ചന്ദ്രന്റെ മണ്ണിൽ സഞ്ചരിച്ചു. ഇതോടെ ചന്ദ്രനിൽ പേടകമിറക്കുന്ന നാലാമത്തെ രാജ്യമായി ഇന്ത്യ മാറി. ദക്ഷിണധ്രുവത്തിലെ കാന്തിക സങ്കീർണ്ണതകൾ അതിജീവിച്ചത് സാങ്കേതിക മേന്മയായി ലോകം അംഗീകരിച്ചു. ചെലവുകുറഞ്ഞ ഗ്രഹാന്തരയാത്രയ്ക്കൊപ്പം ചന്ദ്രനിൽ ജലസാന്നിധ്യം സ്ഥിരീകരിച്ചതും മികവായി.
ചന്ദ്രനിൽ പേടകം ഇറങ്ങിയ സ്ഥലത്തിന് ശിവശക്തി പോയിന്റ് എന്നാണ് ഇന്ത്യ പേര് നൽകിയത്. ദക്ഷിണധ്രുവത്തിൽ ആദ്യമിറങ്ങിയ രാജ്യമെന്ന നിലയിൽ ഇവിടെ ഇന്ത്യയ്ക്ക് മേൽക്കോയ്മയും ലഭിച്ചു. 2028-ലാണ് രാജ്യത്തിന്റെ അടുത്ത ചാന്ദ്രദൗത്യം നടക്കുക. ചന്ദ്രനിൽ പേടകം പോയി തിരിച്ചു വരുന്നതാണ് അടുത്ത ദൗത്യത്തിന്റെ ലക്ഷ്യം.
Story Highlights: India celebrates first National Space Day, commemorating Chandrayaan-3’s successful lunar landing
