ലഡാക്കിലെ 14,000 അടി ഉയരമുള്ള കടുപ്പമേറിയ ഭൂപ്രദേശത്ത് ഇന്ത്യയുടെ 78-ാം സ്വാതന്ത്ര്യദിനം ആഘോഷിച്ച് ഇൻഡോ-ടിബറ്റൻ ബോർഡർ പൊലീസ് (ഐടിബിപി) ത്രിവർണപതാക ഉയർത്തി. മൈനസ് 15 ഡിഗ്രി സെൽഷ്യസ് താപനിലയിൽ ‘ഭാരത് മാതാ കി ജയ്’, ‘വന്ദേമാതരം’ തുടങ്ങിയ മുദ്രാവാക്യങ്ങളുടെ അകമ്പടിയോടെയായിരുന്നു ആഘോഷം. തണുത്ത കാലാവസ്ഥയിൽ രാജ്യത്തെ സേവിക്കുന്ന ഈ സൈനികരെ ‘ഹിംവീർസ്’ എന്നാണ് വിളിക്കുന്നത്.
ചൈനയുമായുള്ള അതിർത്തിയിൽ വിന്യസിച്ചിരിക്കുന്ന ഇന്ത്യയുടെ അർദ്ധസൈനിക വിഭാഗമാണ് ഇന്തോ-ടിബറ്റൻ ബോർഡർ പൊലീസ്. ലഡാക്കിലെ കാരക്കോറം ചുരം മുതൽ അരുണാചൽ പ്രദേശിലെ ദിഫു ലാ വരെയുള്ള ഹിമാലയ പർവ്വതനിരകളിൽ 3488 കിലോമീറ്റർ ദൈർഘ്യമുള്ള ഇന്ത്യ-ചൈന അതിർത്തിയിലാണ് ഇവർ വിന്യസിക്കപ്പെട്ടിരിക്കുന്നത്. പർവ്വതാരോഹണത്തിൽ പ്രത്യേക പരിശീലനം ലഭിച്ച ഓഫീസർമാരും ജവാന്മാരും ഈ സംഘത്തിൽ ഉൾപ്പെടുന്നു.
ഐടിബിപിയുടെ 24-ാം ബറ്റാലിയൻ (വടക്ക് പടിഞ്ഞാറൻ അതിർത്തി) ആണ് ലഡാക്കിലെ ലേയിൽ സ്വാതന്ത്ര്യദിനാഘോഷം നടത്തിയത്. ഓക്സിജൻ കുറഞ്ഞ, കടുത്ത കാലാവസ്ഥയിലും ഇവരുടെ ആവേശം കണ്ടവർ അത്ഭുതപ്പെട്ടു. സമുദ്ര നിരപ്പിൽ നിന്ന് 14,000 അടി ഉയരത്തിൽ ഭാരതത്തിന്റെ പതാക പാറിയപ്പോൾ, അതിർത്തിയിലെ ഈ വീരന്മാരുടെ ദേശസ്നേഹം ഉയരങ്ങളിലേക്ക് ഉയർന്നു.
Story Highlights: ITBP personnel march with tricolour at 14,000 feet in Leh’s inhospitable terrain on Independence Day
