പ്രധാനമന്ത്രി നരേന്ദ്ര മോദിയുടെ സമീപനം പോസിറ്റീവാണെന്ന് മന്ത്രി മുഹമ്മദ് റിയാസ് പറഞ്ഞു. വയനാട്ടിലെ ദുരന്തബാധിത പ്രദേശങ്ങളിൽ നടന്ന ജനകീയ തിരച്ചിൽ ഫലപ്രദമായിരുന്നു. നാട്ടുകാർ തിരച്ചിലിന് നല്ല സഹായം നൽകി.
ജനങ്ങളുടെ ആശയമാണ് ജനകീയ തിരച്ചിൽ. ജനകീയ തിരച്ചിലിന് വൈകാരികബന്ധമുണ്ട്. 2000 പേർ തിരച്ചിലിൽ പങ്കെടുത്തു. മലപ്പുറം ചാലിയറിൽ വിശദമായ തിരച്ചിൽ നാളെയും മറ്റന്നാളും നടക്കും. നാളെ അഞ്ച് സെക്ടറുകളിൽ തിരച്ചിൽ നടക്കും. വിവിധ സേനകൾ രാവിലെ 7 മണിക്ക് മുണ്ടേരി ഫാം ഏരിയയിൽ നിന്ന് തിരച്ചിൽ ആരംഭിക്കും. ചാലിയാർ മുഴുവൻ വിശദമായി പരിശോധിക്കും.
മലപ്പുറം ജില്ലയുടെ ഭാഗങ്ങളിലും തിരച്ചിൽ നടത്തും. 250 വാടക വീടുകൾ താത്കാലിക പുനരധിവാസത്തിനായി കണ്ടെത്തി. ക്യാമ്പിൽ കഴിയുന്നവരുടെ അഭിപ്രായം അറിഞ്ഞു. ദുരന്തബാധിതരുടെ അഭിപ്രായം വിശദമായി സർവ്വേ ചെയ്ത് കണ്ടെത്തും. താത്കാലിക പുനരധിവാസത്തിന് ഏത് പഞ്ചായത്തിൽ പോകണമെന്ന് ഓപ്ഷൻ നൽകും. താത്കാലിക പുനരധിവാസം വേഗത്തിലാക്കാനാണ് സർക്കാർ തീരുമാനം.
ക്യാമ്പിൽ കഴിയുന്ന ചിലർക്ക് ആരുമില്ല. അവർക്ക് പുനരധിവാസം നൽകും. ഒറ്റയ്ക്ക് ഒരു വീട്ടിൽ നിർത്തില്ല. വീട്ടിൽ വേണ്ട ഫർണിച്ചർ ഉൾപ്പെടെ ബേസിക് കിറ്റ് നൽകും. ക്യാമ്പിൽ കഴിയുന്നവർക്ക് സൗജന്യമായി മുടി വെട്ടാൻ കോഴിക്കോട് നിന്നും സലൂൺ ജീവനക്കാർ എത്തി.
കേന്ദ്രത്തിന്റെ പ്രഖ്യാപനം ഉടൻ ഉണ്ടാകുമെന്നാണ് പ്രതീക്ഷ. അതിതീവ്ര ദുരന്തമായി പ്രഖ്യാപിക്കുമെന്ന് പ്രതീക്ഷിക്കുന്നു. ദുരന്തത്തിൽ കാണാതായവരുടെ എണ്ണം 130 ആണ്. 90 പേരുടെ ഡിഎൻഎ സാമ്പിൾ പരിശോധിച്ചു.
Story Highlights: Minister Muhammad Riyas says popular search was effective in Wayanad landslide affected areas.
Image Credit: twentyfournews
