പാരീസ് ഒളിമ്പിക്സിൽ നിന്ന് വിനേഷ് ഫോഗട്ടിനെ അയോഗ്യയാക്കിയ നടപടിയിൽ ഇന്ത്യൻ ഒളിംപിക് അസോസിയേഷൻ (ഐഒഎ) പ്രതിഷേധം അറിയിച്ചതായി കേന്ദ്ര കായികമന്ത്രി മൻസുഖ് മാണ്ഡവ്യ ലോക്സഭയിൽ വ്യക്തമാക്കി. 100 ഗ്രാം കൂടുതൽ ഭാരമാണ് വിനേഷിനെ അയോഗ്യയാക്കാൻ കാരണമായത്. സംഭവത്തെ തുടർന്ന് പ്രധാനമന്ത്രി പിടി ഉഷയുമായി സംസാരിക്കുകയും ഉചിതമായ നടപടി സ്വീകരിക്കാൻ നിർദേശിക്കുകയും ചെയ്തു. യുണൈറ്റഡ് വേൾഡ് റെസ്ലിങ്ങിനൊപ്പം ഐഒഎയും ശക്തമായി പ്രതിഷേധിച്ചതായി മന്ത്രി വ്യക്തമാക്കി.
വിനേഷ് ഫോഗട്ടിന് കേന്ദ്രസർക്കാർ എല്ലാ സൗകര്യങ്ങളും ഒരുക്കി നൽകിയതായും വിദേശ രാജ്യങ്ങളിൽ പരിശീലനത്തിന് അയച്ചിരുന്നതായും കായിക മന്ത്രി പറഞ്ഞു. എന്നാൽ, മന്ത്രിയുടെ വിശദീകരണം തൃപ്തികരമല്ലെന്ന് പ്രതിപക്ഷം ചൂണ്ടിക്കാട്ടി സഭയിൽ ബഹളം വച്ചു. തുടർന്ന്, വിനേഷിന് നൽകിയ സഹായങ്ങളെക്കുറിച്ച് മന്ത്രി വിവരിച്ചു. വിനേഷ് എന്നും ഇന്ത്യയുടെ അഭിമാന താരമാണെന്നും അദ്ദേഹം കൂട്ടിച്ചേർത്തു.
കേന്ദ്ര മന്ത്രിയുടെ പ്രസ്താവനയ്ക്കെതിരെ ഷാഫി പറമ്പിൽ എംപി രംഗത്തെത്തി. നൽകിയ സൗകര്യത്തിന്റെ കണക്ക് നിരത്തേണ്ടത് ഇന്നല്ലെന്നും ഇന്ന് വിനേഷിന് പിന്തുണ അറിയിക്കേണ്ട ദിവസമാണെന്നും അദ്ദേഹം പറഞ്ഞു. വിനേഷ് ഫോഗട്ട് ഇന്ത്യയുടെ ധൈര്യശാലിയായ സുവർണ പുത്രിയാണെന്നും ഷാഫി പറമ്പിൽ കൂട്ടിച്ചേർത്തു. എന്തുകൊണ്ടാണ് വിനേഷിനെ അയോഗ്യയാക്കിയതെന്നതിൽ വിശദീകരണമില്ലെന്നും കേന്ദ്ര കായിക മന്ത്രിയുടെ പ്രതികരണം തൃപ്തികരമല്ലെന്നും വ്യക്തമാക്കി പ്രതിപക്ഷം സഭയിൽ നിന്ന് ഇറങ്ങിപ്പോയി.
Story Highlights: Sports Minister Mansukh Mandaviya addresses Vinesh Phogat’s Olympic disqualification in Lok Sabha
Image Credit: twentyfournews
