വയനാട് ഉരുൾപൊട്ടൽ: സൈന്യത്തിന്റെ നിലപാടിന് മുൻഗണന നൽകി തിരച്ചിൽ തുടരാൻ തീരുമാനം

വയനാട് ഉരുൾപൊട്ടൽ ദുരന്തത്തിൽ സൈന്യത്തിന്റെ നിലപാടിന് മുൻഗണന നൽകി തിരച്ചിൽ തുടരാൻ മന്ത്രിസഭാ ഉപസമിതി യോഗം തീരുമാനിച്ചു. മുഖ്യമന്ത്രി പിണറായി വിജയന്റെ അധ്യക്ഷതയിൽ ചേർന്ന യോഗത്തിൽ ദുരന്ത മേഖലയിലെ തിരച്ചിൽ ഊർജിതമാക്കാനും, പുനരധിവാസത്തിന് പ്രത്യേക പാക്കേജ് തയ്യാറാക്കാനും തീരുമാനിച്ചു. ദേശീയ ദുരന്തനിവാരണ നിധിയിൽ നിന്ന് കൂടുതൽ പണം ആവശ്യപ്പെടാനും, പുനരധിവാസത്തിന് കേന്ദ്രസഹായം അനിവാര്യമാണെന്നും യോഗം വിലയിരുത്തി.

ദേശീയ ദുരന്തമായി പ്രഖ്യാപിക്കണമെന്ന് വീണ്ടും സംസ്ഥാനം ആവശ്യപ്പെടാൻ തീരുമാനിച്ചു. എൽ 3 വിഭാഗത്തിലെ ദുരന്തമായി പ്രഖ്യാപിക്കണമെന്നാണ് ആവശ്യപ്പെടുക. ഏറ്റവും തീവ്രത ഏറിയ ദുരന്തം എന്ന നിലയ്ക്ക് പരിഗണന വേണമെന്നും ആവശ്യം ഉന്നയിക്കും. അങ്ങനെയെങ്കിൽ ദേശീയ ദുരന്ത നിവാരണ നിധിയിൽ നിന്ന് ആകെ വേണ്ട തുകയുടെ 75% ലഭിക്കുമെന്നും യോഗത്തിൽ വിലയിരുത്തി. ചാലിയാറിലും തിരച്ചിൽ ഊർജിതമായി നടപ്പാക്കാനും, പൊളിഞ്ഞ് വീഴാൻ സാധ്യതയുള്ള കെട്ടിടങ്ങൾ പൊളിച്ചു നീക്കാനും തീരുമാനിച്ചു.

ദുരന്ത ബാധിതരായ കുട്ടികളുടെ വിദ്യാഭ്യാസത്തിന് പ്രത്യേക പദ്ധതി തയ്യാറാക്കാനും യോഗത്തിൽ തീരുമാനമായി. താൽക്കാലിക പഠന കേന്ദ്രം സ്ഥാപിക്കുകയോ സമീപത്തെ സ്കൂളുകളിലേക്ക് മാറ്റുകയോ ചെയ്യാനാണ് നിലവിലെ തീരുമാനം. അതേസമയം, ദുരന്തത്തിൽ മരിച്ചവരുടെ എണ്ണം 387 ആയി ഉയർന്നു. ഇതിൽ 172 പേരെ മാത്രമാണ് ഇതുവരെ തിരിച്ചറിഞ്ഞിട്ടുള്ളത്. ഇനിയും 200-ലേറെ പേരെ കണ്ടെത്താനുണ്ടെന്നും, ഏഴാം ദിവസവും തിരച്ചിൽ തുടരുന്നതായും യോഗം വിലയിരുത്തി.

Story Highlights: Cabinet sub-committee decides to continue search in Wayanad landslide until army’s approval

Image Credit: twentyfournews