മുസ്ലിം ലീഗ് വയനാട് മുണ്ടക്കയിലെ ഉരുൾപൊട്ടൽ ദുരിതബാധിതർക്കായി പുനരധിവാസ പദ്ധതി ആരംഭിച്ചു. സംസ്ഥാന അധ്യക്ഷൻ സയ്യിദ് സാദിഖലി ശിഹാബ് തങ്ങളും പി.കെ. കുഞ്ഞാലിക്കുട്ടിയും ചേർന്ന് ഇതിനായുള്ള ആപ്ലിക്കേഷൻ പുറത്തിറക്കി. ഫേസ്ബുക്കിലൂടെ പങ്കുവച്ച വീഡിയോയിൽ എല്ലാവരും സഹായിക്കണമെന്ന് സാദിഖലി ശിഹാബ് തങ്ങൾ അഭ്യർത്ഥിച്ചു.
‘വയനാടിന്റെ കണ്ണീരൊപ്പാൻ’ എന്ന പേരിലുള്ള ഈ പദ്ധതി ഓഗസ്റ്റ് 2 മുതൽ 15 വരെയാണ് നടത്താൻ തീരുമാനിച്ചിരിക്കുന്നത്. ഭവന പദ്ധതി, വിദ്യാഭ്യാസം, ചികിത്സ, തൊഴിൽ തുടങ്ങി സമഗ്രമായ പുനരധിവാസ പദ്ധതിയാണ് മുസ്ലിം ലീഗ് ആവിഷ്കരിച്ചിരിക്കുന്നത്. വിവിധ സ്ഥലങ്ങളിലും വയനാട്ടിലും മുസ്ലിം ലീഗിന്റെ നേതൃത്വത്തിൽ ജീവകാരുണ്യ പ്രവർത്തനങ്ങൾ ആരംഭിക്കുമെന്നും അദ്ദേഹം അറിയിച്ചു.
പദ്ധതിയിലേക്കുള്ള ആദ്യ ഫണ്ടായി 50 ലക്ഷം രൂപ തിരുനാവായ സ്വദേശി ബാബുവിൽ നിന്ന് സ്വീകരിക്കുമെന്ന് സാദിഖലി തങ്ങൾ വ്യക്തമാക്കി. ഉരുൾപൊട്ടൽ ഉണ്ടായ ആദ്യദിനം മുതൽ വൈറ്റ് ഗാർഡും യൂത്ത് ലീഗും മുസ്ലിം ലീഗും വയനാട്ടിൽ സജീവമാണെന്ന് പി.കെ. കുഞ്ഞാലിക്കുട്ടിയും കൂട്ടിച്ചേർത്തു. ഈ പ്രകൃതി ദുരന്തത്തിൽ ദുരിതമനുഭവിക്കുന്നവരെ സഹായിക്കാൻ എല്ലാവരും മുന്നോട്ടുവരണമെന്ന് നേതാക്കൾ അഭ്യർത്ഥിച്ചു.
Story Highlights: Muslim League launches app for rehabilitation of Wayanad landslide victims
Image Credit: twentyfournews
