വയനാട് ദുരന്ത മേഖലയിൽ കനത്ത മഴ തുടരുന്നു. ചൂരൽമല പുഴയിൽ ജലനിരപ്പ് ഉയർന്നതിനെ തുടർന്ന് സൈന്യം നിർമ്മിച്ച താൽക്കാലിക പാലം മുങ്ങി. ഇതോടെ രക്ഷാപ്രവർത്തകർ പുഴയുടെ മറുകരയിൽ കുടുങ്ങിയ അവസ്ഥയിലാണ്. ഉച്ചയ്ക്കുശേഷം പെയ്ത കനത്ത മഴയാണ് ജലനിരപ്പ് ഉയർത്തിയത്. ബെയ്ലി പാലത്തിന്റെ നിർമാണത്തെയും മഴ സാരമായി ബാധിച്ചിട്ടുണ്ട്.
നിലവിൽ പുഴ കടക്കാൻ കഴിയാത്ത സാഹചര്യമാണുള്ളത്. ജലനിരപ്പ് കുറഞ്ഞാൽ മാത്രമേ മറുകരയിൽ കുടുങ്ങിയവർക്ക് തിരികെ വരാൻ കഴിയൂ. പാലത്തിലൂടെ വരരുതെന്ന് മുന്നറിയിപ്പ് നൽകിയിട്ടുണ്ട്. മഴ ശക്തമായതോടെ മുണ്ടക്കൈ മേഖലയിലുള്ള രക്ഷാപ്രവർത്തകർ താഴേക്കിറങ്ങുകയും താത്കാലിക പാലത്തിലൂടെയുള്ള രക്ഷാപ്രവർത്തനം പൂർണമായും നിർത്തുകയും ചെയ്തു. ഇത് രക്ഷാപ്രവർത്തനത്തെ കടുത്ത പ്രതിസന്ധിയിലാക്കിയിരിക്കുകയാണ്.
മഴ കൂടുംതോറും ഉൾവനത്തിൽ നിന്ന് കുത്തൊഴുക്കിൽ വെള്ളം താഴേക്കെത്തുന്നുണ്ട്. പാലത്തിന്റെ ഒരു ഭാഗം മൺതിട്ടയിലാണ് ഉറപ്പിച്ചിരിക്കുന്നത്. ജലനിരപ്പ് ഉയർന്നതോടെ പാലത്തിലൂടെയുള്ള രക്ഷാപ്രവർത്തനം തുടരുന്നത് ജീവന് ഭീഷണിയാണ്. മഴ ശമിച്ചാൽ മാത്രമേ പാലത്തിലൂടെയുള്ള രക്ഷാപ്രവർത്തനം പുനരാരംഭിക്കുകയുള്ളൂ. അതേസമയം, ബെയ്ലി പാലത്തിന്റെ നിർമ്മാണം ദ്രുതഗതിയിൽ പുരോഗമിക്കുന്നുണ്ട്. നാളെയോടെ പാലത്തിന്റെ നിർമ്മാണം പൂർത്തിയാകുമെന്നാണ് പ്രതീക്ഷ.
Story Highlights: Heavy rain in Wayanad disaster zone, temporary bridge submerged, rescue operations halted
Image Credit: twentyfournews
