കർണാടകയിലെ ഷിരൂരിൽ മണ്ണിടിച്ചിലിൽ കാണാതായ അർജുനായുള്ള തിരച്ചിൽ നിർത്തരുതെന്ന് കുടുംബം ആവശ്യപ്പെട്ടു. ആധുനിക സാങ്കേതിക വിദ്യകൾ ഉപയോഗിച്ച് തിരച്ചിൽ തുടരണമെന്നും, പെട്ടെന്ന് തിരച്ചിൽ നിർത്തുന്നത് ഉൾക്കൊള്ളാൻ കഴിയുന്നില്ലെന്നും അർജുന്റെ സഹോദരി വ്യക്തമാക്കി. കേരള കർണാടക സർക്കാരുകൾ സഹായിച്ചിട്ടുണ്ടെന്നും ആരെയും കുറ്റപ്പെടുത്താനില്ലെന്നും കുടുംബം പറഞ്ഞു.
അർജുനെ പോലെ മറ്റു രണ്ടു പേരെ കൂടി കണ്ടെത്താനുണ്ട്. ലോറി കണ്ടെത്തിയതായി അറിയിച്ചിരുന്നെങ്കിലും പിന്നീട് അതിനെക്കുറിച്ച് യാതൊരു വിവരവും ലഭിച്ചില്ലെന്ന് അർജുന്റെ സഹോദരി വെളിപ്പെടുത്തി. 13 ദിവസത്തെ തിരച്ചിലിന് ശേഷമാണ് ദൗത്യം താത്കാലികമായി നിർത്തിവയ്ക്കാൻ അധികൃതർ തീരുമാനിച്ചത്.
കാർവാർ എംഎൽഎ സതീഷ് കൃഷ്ണ സെയിൽ പറഞ്ഞതനുസരിച്ച്, ഷിരൂരിൽ സാഹചര്യങ്ങൾ അനുകൂലമാകുമ്പോൾ തിരച്ചിൽ പുനരാരംഭിക്കും. ഗംഗാവലി നദിയിലെ അടിയൊഴുക്ക് കുറയുകയും ജലനിരപ്പ് താഴുകയും വേണമെന്ന് അദ്ദേഹം വ്യക്തമാക്കി. തൃശൂരിൽ നിന്ന് ഡ്രഡ്ജിങ് മെഷീൻ കൊണ്ടുവരുമെന്നും, ടെക്നീഷ്യൻ എത്തി ആദ്യം പരിശോധിക്കണമെന്നും എംഎൽഎ കൂട്ടിച്ചേർത്തു.
