ഷിരൂരിലെ മണ്ണിടിച്ചിലിൽ കാണാതായ അർജുനായുള്ള തിരച്ചിൽ താത്കാലികമായി നിർത്തിയതായി ജില്ലയുടെ ചുമതലയുള്ള മന്ത്രി മംഗളവൈദ്യ അറിയിച്ചു. എല്ലാ ശ്രമങ്ങളും നടത്തിയെന്നും അനുകൂല സാഹചര്യം ഉണ്ടായാൽ തിരച്ചിൽ തുടരുമെന്നും മന്ത്രി വ്യക്തമാക്കി. പതിമൂന്ന് ദിവസമായി നടത്തിയ തിരച്ചിലിൽ കാര്യമായ ഫലം ഉണ്ടായില്ല. ഗംഗാവലി പുഴയിലെ ശക്തമായ അടിയൊഴുക്കും ചെളിയും പാറയും രക്ഷാപ്രവർത്തനത്തിന് തടസ്സമായി.
രണ്ടു ദിവസമായി മുങ്ങൽ വിദഗ്ധനായ മത്സ്യത്തൊഴിലാളി ഈശ്വർ മാൽപെയുടെ നേതൃത്വത്തിലുള്ള സംഘമാണ് തെരച്ചിൽ നടത്തിയത്. പുഴയുടെ അടിയിൽ കാഴ്ച പൂർണമായും ഇല്ലെന്നും ദൗത്യം അതീവ ദുഷ്കരമാണെന്നും ഈശ്വർ മാൽപെ നേരത്തെ വ്യക്തമാക്കിയിരുന്നു. കാർവാർ എംഎൽഎ സതീഷ് കൃഷ്ണ സെയിലും തിരച്ചിലിന്റെ പ്രയാസങ്ങൾ ചൂണ്ടിക്കാട്ടി. നദി ശാന്തമായാൽ മാത്രമേ ദൗത്യം തുടരാൻ സാധിക്കൂവെന്നും അടുത്ത 21 ദിവസം മേഖലയിൽ കനത്ത മഴയ്ക്ക് സാധ്യതയുണ്ടെന്നും അദ്ദേഹം പറഞ്ഞു.
എന്നാൽ തിരച്ചിൽ നിർത്തുന്നതിനെതിരെ കേരളം രംഗത്തെത്തി. തിരച്ചിൽ നിർത്തിയത് ദൗർഭാഗ്യകരമാണെന്ന് മന്ത്രി മുഹമ്മദ് റിയാസ് പ്രതികരിച്ചു. സാധ്യതകൾ പ്രയോജനപ്പെടുത്തിയില്ലെന്ന് മന്ത്രി കുറ്റപ്പെടുത്തി. രക്ഷാ പ്രവർത്തനം നിർത്തി വെക്കരുതെന്ന് മന്ത്രി ആവശ്യപ്പെട്ടു. ആവശ്യമായ സംവിധാനങ്ങളോടെ രക്ഷാദൗത്യം തുടരണമെന്നാവശ്യപ്പെട്ട് മുഖ്യമന്ത്രി പിണറായി വിജയൻ കർണാടക മുഖ്യമന്ത്രി സിദ്ധരാമയ്യയ്ക്ക് കത്തയച്ചു.
