ഫ്രാൻസിന്റെ അത്‌ലറ്റ് സൗങ്കമ്പ സില്ല, 2024 പാരീസ് ഒളിമ്പിക്സിന്റെ ഉദ്ഘാടന ചടങ്ങില്‍ നിന്ന് ഹിജാബ് ധരിക്കുന്നതിനാല്‍ വിലക്ക് നേരിട്ടതായി വെളിപ്പെടുത്തി. 400 മീറ്റർ വനിത, മിക്‌സഡ് ടീമുകളുടെ ഭാഗമായ സില്ല, തന്റെ സോഷ്യല്‍ മീഡിയ പോസ്റ്റില്‍ ഈ വിവരം പങ്കുവച്ചു. ഫ്രാൻസിനെ പ്രതിനിധീകരിക്കുന്ന കായികതാരങ്ങള്‍ക്ക് മതചിഹ്നങ്ങള്‍ പ്രദർശിപ്പിക്കാൻ അനുമതിയില്ലെന്ന ഫ്രാൻസ് കായിക മന്ത്രിയുടെ നിർദേശത്തിന്റെ ഭാഗമാണ് ഈ നടപടി.
ഫ്രഞ്ച് ഒളിമ്പിക് കമ്മിറ്റി പ്രസിഡന്റ് ഡേവിഡ് ലപ്പാർഷ്യൻ, രാജ്യത്തെ പൊതുമേഖലാ തൊഴിലാളികള്‍ക്ക് ബാധകമാകുന്ന മതേതര തത്വങ്ങള്‍ ഫ്രഞ്ച് ഒളിമ്പ്യന്മാർക്കും ബാധകമാണെന്ന് വ്യക്തമാക്കിയിരുന്നു. എന്നാല്‍, വിദേശ അത്‌ലീറ്റുകള്‍ക്ക് ഇത്തരം നിയമങ്ങള്‍ ബാധകമല്ല. അന്താരാഷ്ട്ര ഒളിമ്പിക് കമ്മിറ്റി മതപരമായ ചിഹ്നങ്ങള്‍ പ്രദർശിപ്പിക്കുന്നതിന് വിലക്കേർപ്പെടുത്തിയിട്ടില്ല.
യുഎൻ മനുഷ്യാവകാശ കമ്മീഷൻ വക്താവായ മരിയ ഹുർട്ടാഡൊ ഫ്രഞ്ച് സർക്കാരിന്റെ നീക്കങ്ങള്‍ക്കെതിരെ രൂക്ഷമായ വിമർശനം നടത്തി. ഒരു സ്ത്രീ എന്ത് ധരിക്കണം, ധരിക്കണ്ട എന്നത് ആരും അടിച്ചേല്‍പ്പിക്കേണ്ടതില്ല എന്ന് മരിയ അഭിപ്രായപ്പെട്ടു. ഈ വിവാദം 2024 പാരീസ് ഒളിമ്പിക്സിന് മുന്നോടിയായി മതസ്വാതന്ത്ര്യവും വ്യക്തിസ്വാതന്ത്ര്യവും സംബന്ധിച്ച ചർച്ചകൾക്ക് വഴിവച്ചിരിക്കുകയാണ്.
