ഇംഗ്ലണ്ട് ദേശീയ ടീമിന്റെ പരിശീലകനായി എട്ട് വർഷത്തോളം സേവനമനുഷ്ഠിച്ച ഗാരത് സൗത്ത് ഗെയ്റ്റ് സ്ഥാനമൊഴിയുന്നു. യൂറോ-2024 ഫൈനലിൽ സ്പെയിനിനോട് 2-1ന് പരാജയപ്പെട്ടതിനെ തുടർന്നാണ് 53 വയസ്സുകാരനായ സൗത്ത് ഗെയ്റ്റ് ഈ തീരുമാനമെടുത്തത്. 1966-ൽ ലോകകപ്പ് നേടിയതിന് ശേഷം ഒരു പ്രധാന ടൂർണമെന്റിലും ഇംഗ്ലണ്ടിന് കിരീടം നേടാനായില്ലെന്ന നിരാശ രാജ്യത്തെ മുഴുവൻ ബാധിച്ചിരിക്കുന്നു.
2016-ൽ നിയമിതനായ സൗത്ത് ഗെയ്റ്റ് ഇംഗ്ലണ്ടിന്റെ ഏറ്റവും കൂടുതൽ കാലം സേവനമനുഷ്ഠിച്ച മൂന്നാമത്തെ മാനേജരാണ്. 102 മത്സരങ്ങളിൽ 61 വിജയങ്ങൾ നേടി രാജ്യത്തെ ഏറ്റവും വിജയകരമായ പരിശീലകരിൽ ഒരാളായി അദ്ദേഹം മാറി. 2021-ൽ ആദ്യമായി യൂറോ ഫൈനലിലെത്തിയെങ്കിലും ഇറ്റലിയോട് ഷൂട്ടൗട്ടിൽ പരാജയപ്പെട്ടു. ഈ വർഷം കിരീടം നേടുമെന്ന പ്രതീക്ഷയോടെയാണ് ടീം മത്സരിച്ചതെങ്കിലും സ്പെയിനിന്റെ കരുത്തിന് മുന്നിൽ വീണ്ടും പരാജയപ്പെട്ടു.
സൗത്ത് ഗെയ്റ്റ് പുറത്തുവിട്ട പ്രസ്താവനയിൽ കളിക്കാരെയും സ്റ്റാഫിനെയും ആരാധകരെയും നന്ദിയോടെ സ്മരിച്ചു. ഇംഗ്ലണ്ടിനായി കളിക്കാനും പരിശീലിപ്പിക്കാനും ലഭിച്ച അവസരം ജീവിതത്തിലെ ബഹുമതിയായി കരുതുന്നതായി അദ്ദേഹം പറഞ്ഞു. അസിസ്റ്റന്റ് മാനേജർ സ്റ്റീവ് ഹോളണ്ടും സൗത്ത് ഗെയ്റ്റിനൊപ്പം സ്ഥാനമൊഴിഞ്ഞു. യൂറോയിൽ ഇംഗ്ലണ്ട് ആദ്യ റൗണ്ടിൽ നിന്ന് ഫൈനൽ വരെ എത്തിയെങ്കിലും കിരീടം നേടാനായില്ല.
