വിഴിഞ്ഞം തുറമുഖത്തിന്റെ പ്രവർത്തനം സജീവമാകുന്നു. ആദ്യമായി എത്തിയ മദർ ഷിപ്പ് സാൻ ഫെർണാണ്ടോ മടങ്ങിയതിന് പിന്നാലെ, തിങ്കളാഴ്ച ഉച്ചയ്ക്ക് മാരിൻ അസൂർ എന്ന ഫീഡർഷിപ്പ് തുറമുഖത്ത് അടുത്തു. ഇന്ന് ഈ കപ്പൽ ചരക്കുമായി മടങ്ങും. കൊളംബോയിൽ നിന്നെത്തിയ മാരിൻ അസൂർ മുംബൈ തുറമുഖത്തേക്കാണ് പോകുന്നത്.
രണ്ടാമത്തെ ഫീഡർഷിപ്പായ സീസ്പാൻ സാൻ്റോസ് 21ന് വിഴിഞ്ഞം തുറമുഖത്ത് എത്തിച്ചേരും. ഹോങ് കോങ്ങിൽ രജിസ്റ്റർ ചെയ്തിട്ടുള്ള ഈ കപ്പൽ, തുറമുഖത്ത് അവശേഷിക്കുന്ന കണ്ടെയ്നറുകൾ ഗുജറാത്ത്, കൊൽക്കത്ത, മംഗളൂർ തുടങ്ങിയ തുറമുഖങ്ങളിലേക്ക് എത്തിക്കും. സാൻ ഫെർണാണ്ടോ തുറമുഖത്ത് ഇറക്കിയ കണ്ടെയ്നറുകളിൽ ഒരു ഭാഗം മാരിൻ അസൂറിൽ ലോഡ് ചെയ്യും.
ആദ്യ ഫീഡർ ഷിപ്പ് ചരക്കുകയറ്റി മടങ്ങുന്നതോടെ വിഴിഞ്ഞത്ത് ചരക്ക് നീക്കം പ്രാവർത്തികമാകും. 400 മീറ്റർ നീളമുള്ള മദർ ഷിപ്പുകൾ ഉൾപ്പെടെ ഉടൻ വിഴിഞ്ഞത്ത് ചരക്കുമായി എത്തുമെന്ന് പ്രതീക്ഷിക്കുന്നു. ഇതോടെ വിഴിഞ്ഞം തുറമുഖത്തിന്റെ പ്രവർത്തനം പൂർണതോതിൽ ആരംഭിക്കുകയാണ്.
