കേരളത്തിൽ ബിജെപിയോടും താമര ചിഹ്നത്തോടുമുള്ള അലർജി മാറിയെന്ന് കോൺഗ്രസ് നേതാവ് കെ മുരളീധരൻ അഭിപ്രായപ്പെട്ടു. എൽഡിഎഫിനും യുഡിഎഫിനും മാറിമാറി വോട്ട് ചെയ്തിരുന്ന വിഭാഗങ്ങൾ ഇപ്പോൾ ബിജെപിയെ സ്വീകരിക്കുന്നത് ഇരുമുന്നണികളും ഗൗരവത്തോടെ കാണണമെന്ന് അദ്ദേഹം പറഞ്ഞു. തിരുവനന്തപുരത്ത് നാല് മാസം മുമ്പേ രാജീവ് ചന്ദ്രശേഖരൻ വന്നിരുന്നെങ്കിൽ രാഷ്ട്രീയ ചിത്രം മാറിയേനെ എന്നും മുരളീധരൻ കൂട്ടിച്ചേർത്തു.
വയനാട്ടിൽ നടന്ന കെപിസിസി ക്യാമ്പിൽ പങ്കെടുക്കാത്തതിനെക്കുറിച്ച് ചോദിച്ചപ്പോൾ, പരിഹാസം കലർന്ന മറുപടിയാണ് മുരളീധരൻ നൽകിയത്. ക്യാമ്പ് പാർട്ടിയെ ശക്തിപ്പെടുത്താനാണെന്നും, തനിക്ക് ഇപ്പോൾ ശക്തിയില്ലാത്ത സമയമാണെന്നും അദ്ദേഹം പറഞ്ഞു. എങ്ങനെയാണ് ശക്തിപ്പെടുത്തേണ്ടതെന്ന് അറിയിച്ചാൽ അങ്ങനെ ചെയ്യാമെന്നും അദ്ദേഹം കൂട്ടിച്ചേർത്തു.
കെപിസിസി ക്യാമ്പ് എക്സിക്യുട്ടീവിൽ വരാനിരിക്കുന്ന ഉപതെരഞ്ഞെടുപ്പുകൾ, തദ്ദേശ തെരഞ്ഞെടുപ്പ്, നിയമസഭാ തെരഞ്ഞെടുപ്പ് എന്നിവയ്ക്കായുള്ള മുന്നൊരുക്കങ്ങൾ നടക്കുന്നുണ്ട്. വിജയത്തിനായുള്ള കർമ്മ പദ്ധതി ക്യാമ്പിൽ ആവിഷ്കരിക്കുമെന്നും അറിയിച്ചു. ദേശീയ രാഷ്ട്രീയത്തെ കോൺഗ്രസ് നിർണയിക്കുന്ന കാലമാകും ഇനിയെന്ന് എഐസിസി ജനറൽ സെക്രട്ടറി കെസി വേണുഗോപാൽ പ്രസ്താവിച്ചു. നേതൃനിരയിലെ അഭിപ്രായ ഭിന്നത സംഘടനയെ ബാധിക്കരുതെന്ന് കെ സുധാകരനും, എല്ലാവരെയും ഒന്നിച്ചു കൊണ്ടുപോകണമെന്ന് വിഡി സതീശനും അഭിപ്രായപ്പെട്ടു.
