തിരുവനന്തപുരം റെയിൽവേ സ്റ്റേഷന് സമീപത്തെ ആമയിഴഞ്ചാൻ തോട് വൃത്തിയാക്കാനിറങ്ങിയ ശുചീകരണ തൊഴിലാളി ജോയിയെ കണ്ടെത്താനുള്ള ശ്രമങ്ങൾ തുടരുകയാണ്. സ്കൂബാ ടീം 40 മീറ്റർ വരെ തിരച്ചിൽ നടത്തിയെങ്കിലും ജോയിയെ കണ്ടെത്താനായില്ല. മാലിന്യം നീക്കം ചെയ്താൽ മാത്രമേ തുടർന്നുള്ള തിരച്ചിൽ സാധ്യമാകൂവെന്ന് സ്കൂബാ ടീം അറിയിച്ചു.
റെയിൽവേ പ്ലാറ്റ്ഫോമിന് അടിയിലുള്ള ആമയഴിഞ്ചൻ തോടിന്റെ നീളം 250 മീറ്ററാണ്. ഒരാൾപ്പൊക്കത്തിൽ ചെളിയും മാലിന്യവും നിറഞ്ഞിരിക്കുന്നത് രക്ഷാപ്രവർത്തനത്തെ ദുഷ്കരമാക്കുന്നു. ടണലിനുള്ളിലെ ഇരുട്ടും തിരച്ചിലിന് വെല്ലുവിളി ഉയർത്തുന്നുണ്ട്. ഈ സാഹചര്യത്തിൽ മറ്റു വഴികൾ ആലോചിക്കുന്നതായി ഫയർ ഫോഴ്സ് അറിയിച്ചു.
രാവിലെ 10 മണിക്കാണ് മാരായമുട്ടം സ്വദേശിയായ ജോയിയെ കാണാതായത്. ശക്തമായ മഴയിൽ ആമയിഴഞ്ചാൻ തോടിലെ അടിയൊഴുക്കിൽപ്പെട്ടാണ് അദ്ദേഹം കാണാതായത്. അവിവാഹിതനായ ജോയി അമ്മയ്‌ക്കൊപ്പമാണ് താമസിച്ചിരുന്നത്. ആക്രി സാധനങ്ങൾ ശേഖരിച്ച് വിൽക്കുന്നതായിരുന്നു അദ്ദേഹത്തിന്റെ വരുമാനമാർഗം. കരാറുകാർ വിളിച്ചപ്പോഴാണ് തോട് വൃത്തിയാക്കാൻ പോയത്. ജോയിയെ കണ്ടെത്താനുള്ള ശ്രമങ്ങൾ തുടരുകയാണ്.
