കോഴിക്കോട് സിപിഐഎം ജില്ലാ സെക്രട്ടറി പി മോഹനൻ, പ്രമോദ് കോട്ടൂളിയുടെ പാർട്ടി പുറത്താക്കലിനെക്കുറിച്ച് പ്രതികരിച്ചു. പിഎസ്‌സി കോഴ ആരോപണത്തിന്റെ പേരിലല്ല, മറിച്ച് പാർട്ടി അച്ചടക്കം ലംഘിച്ചതിനാണ് നടപടിയെന്ന് അദ്ദേഹം വ്യക്തമാക്കി. ജില്ലാ കമ്മിറ്റി ഏകകണ്ഠമായി പ്രമോദിനെ പ്രാഥമിക അംഗത്വത്തിൽ നിന്ന് പുറത്താക്കാൻ തീരുമാനിച്ചതായും മോഹനൻ അറിയിച്ചു.
എന്നാൽ, പ്രമോദ് കോട്ടൂളി എന്ത് അച്ചടക്ക ലംഘനമാണ് നടത്തിയതെന്ന് പി മോഹനൻ വിശദീകരിച്ചില്ല. സിപിഐഎം പുറത്തിറക്കിയ വാർത്താക്കുറിപ്പിൽ കോഴയെക്കുറിച്ച് പരാമർശമില്ല. പാർട്ടി സൽപ്പേരിനു കളങ്കം ഉണ്ടാക്കിയതിനാണ് പുറത്താക്കൽ എന്നു മാത്രമാണ് അതിൽ പറഞ്ഞിരിക്കുന്നത്. മാധ്യമങ്ങളുടെ മറ്റ് ചോദ്യങ്ങൾക്ക് മോഹനൻ മറുപടി നൽകിയില്ല.
സംസ്ഥാന സെക്രട്ടറിയേറ്റിൽ നിന്ന് കടുത്ത നടപടി സ്വീകരിക്കണമെന്ന നിർദേശമുണ്ടായിരുന്നു. പ്രമോദിനെതിരെ പിഎസ്‌സി കോഴ ആരോപണം ഉയർന്നിരുന്നു. മന്ത്രി മുഹമ്മദ് റിയാസ് വഴി പിഎസ്‌സി അംഗത്വം ശരിയാക്കാമെന്ന വാഗ്ദാനം നൽകി പണം വാങ്ങിയെന്നായിരുന്നു പരാതി. പാർട്ടിക്കു ചേരാത്ത പ്രവർത്തനം നടത്തിയെന്ന വിമർശനവും കമ്മിറ്റിയിൽ ഉയർന്നിരുന്നു.
