ഗുജറാത്തിലെ അങ്ക്ലേശ്വറിലെ ഹോട്ടൽ ലോർഡ്സ് പ്ലാസയിൽ സ്വകാര്യ കെമിക്കൽ ഫാക്ടറിയിലെ അഞ്ച് ഒഴിവുകളിലേക്കുള്ള അഭിമുഖം നടന്നപ്പോൾ നൂറുകണക്കിന് യുവാക്കൾ എത്തിച്ചേർന്നു. ഷിഫ്റ്റ് ഇൻ ചാർജ്, പ്ലാൻ്റ് ഓപ്പറേറ്റർ, സൂപ്പർവൈസർ, ഫിറ്റർ-മെക്കാനിക്കൽ, എക്സിക്യുട്ടീവ് തുടങ്ങിയ സ്ഥാനങ്ങളിലേക്കായിരുന്നു നിയമനം. സംസ്ഥാനത്ത് പ്രശസ്തമായ സ്ഥാപനത്തിലേക്കായിരുന്നു അഭിമുഖമെന്നാണ് റിപ്പോർട്ട്.
കെമിക്കൽ എഞ്ചിനീയറിങ് ബിരുദധാരികളും ഐടിഐ പാസായവരും ഉൾപ്പെടെ നിരവധി പേരാണ് ഹോട്ടലിൽ തൊഴിൽ തേടി എത്തിയത്. അഭിമുഖത്തിനായി ഹോട്ടൽ മുറിയിൽ ആദ്യം പ്രവേശിക്കാൻ ഉദ്യോഗാർത്ഥികൾ തമ്മിൽ തിക്കിത്തിരക്കി. ഹോട്ടലിന്റെ പ്രവേശന ഭാഗത്തുള്ള ചരിഞ്ഞ പ്രതലത്തിൽ വരിയിൽ നിൽക്കാനുള്ള ശ്രമം ഒരു ഉദ്യോഗാർത്ഥി മൊബൈലിൽ പകർത്തി.
ഗുജറാത്തിൽ തന്നെ 10 സ്ഥലങ്ങളിൽ കമ്പനി അഭിമുഖം നടത്തിയിരുന്നു. എല്ലായിടത്തും നിരവധി പേർ പങ്കെടുത്തു. അഭിമുഖത്തിലെ തിക്കും തിരക്കും സംബന്ധിച്ച് കമ്പനി ഇതുവരെ പ്രതികരിച്ചിട്ടില്ല. സംഭവത്തിന്റെ വീഡിയോ ഇപ്പോൾ സമൂഹമാധ്യമങ്ങളിൽ വൈറലായി മാറിയിരിക്കുകയാണ്.
