സംസ്ഥാന സർക്കാർ ഐഎഎസ് തലത്തിൽ വലിയ അഴിച്ചുപണി നടത്തി. സപ്ലൈകോ സി.എം.ഡി സ്ഥാനത്ത് നിന്ന് ശ്രീറാം വെങ്കിട്ടരാമനെ നീക്കി പകരം പി.ബി. നൂഹിനെ നിയമിച്ചു. നിലവിൽ ടൂറിസം ഡയറക്ടറായിരുന്ന നൂഹ് അവധിയിലായിരുന്നു. ഈ മാസം 22 ന് തിരിച്ചെത്താനിരിക്കെയാണ് അദ്ദേഹത്തിന് പുതിയ ചുമതല നൽകിയത്. എന്നാൽ ശ്രീറാം വെങ്കിട്ടരാമന് പുതിയ നിയമനം നൽകിയിട്ടില്ല.
നൂഹ് അവധിയിൽ പോയപ്പോൾ താൽക്കാലിക ചുമതല വഹിച്ചിരുന്ന ശിഖ സുരേന്ദ്രനാണ് പുതിയ ടൂറിസം ഡയറക്ടർ. കെ.ടി.ഡി.സി എം.ഡി സ്ഥാനവും ശിഖ വഹിക്കും. മദ്യനയം മാറ്റ ചർച്ചക്കിടെ ടൂറിസം മന്ത്രിയും ഡയറക്‌ടറും തമ്മിൽ ഭിന്നത ഉണ്ടെന്ന വാർത്തകൾ വന്നതിന് പിന്നാലെയാണ് നൂഹ് അവധിയിൽ പ്രവേശിച്ചത്.
മറ്റ് ഐഎഎസ് നിയമനങ്ങളും സർക്കാർ നടത്തി. എറണാകുളം ജില്ലാ വികസന കമീഷണർ എം.എസ്. മാധവിക്കുട്ടിയെ ആരോഗ്യ–കുടുംബക്ഷേമ വകുപ്പ് ഡെപ്യൂട്ടി സെക്രട്ടറിയാക്കി. ഫോർട്ട് കൊച്ചി സബ് കലക്ടർ കെ. മീരക്കാണ് എറണാകുളം ജില്ലാ വികസന കമീഷണറുടെ അധിക ചുമതല. കൊച്ചി‍ൻ സ്മാർട്ട് മിഷൻ ലിമിറ്റഡ് സി.ഇ.ഒ ഷാജി വി.നായർക്ക് വൈറ്റില മൊബിലിറ്റി ഹബ് എം.ഡിയുടെ അധികച്ചുമതലയും നൽകി.
