ഗുജറാത്തിലെ സൂറത്തിൽ ആറുനില കെട്ടിടം തകർന്നുവീണ് ഏഴ് പേർ മരിച്ചു. ഇന്നലെ ഉച്ചതിരിഞ്ഞ് മൂന്നുമണിയോടെയാണ് അപകടം സംഭവിച്ചത്. ഗാർമെൻറ് ഫാക്ടറി തൊഴിലാളികളും കുടുംബങ്ങളും വാടകയ്ക്ക് താമസിച്ചിരുന്ന കെട്ടിടമാണ് തകർന്നത്. ഓരോ നിലയിലും അഞ്ചോ ആറോ ഫ്ലാറ്റുകൾ ഉണ്ടായിരുന്നുവെന്നാണ് റിപ്പോർട്ട്.
എൻഡിആർഎഫ് ഉൾപ്പെടെയുള്ള സംഘം രക്ഷാപ്രവർത്തനം തുടരുകയാണ്. ജെസിബിയും ഡ്രില്ലിങ് മെഷീനുകളും ഉപയോഗിച്ച് അവശിഷ്ടങ്ങൾ നീക്കി തിരച്ചിൽ നടത്തുന്നു. ഫ്ലഡ് ലൈറ്റുകൾ സ്ഥാപിച്ച് രാത്രിയിലും രക്ഷാപ്രവർത്തനം തുടരുന്നുണ്ട്. അപകടത്തിൽ ഒരാളെ പരുക്കുകളോടെ രക്ഷപ്പെടുത്തി ആശുപത്രിയിലേക്ക് മാറ്റി.
എത്ര പേർ അപകടത്തിൽപ്പെട്ടുവെന്നും എത്രപേർ കുടുങ്ങിക്കിടക്കുന്നുവെന്നും ഇനിയും വ്യക്തമല്ലെന്ന് എംഎൽഎയും ജില്ലാ കളക്ടറും അറിയിച്ചു. അപകടത്തിന്റെ കാരണം ഇതുവരെ വ്യക്തമായിട്ടില്ല. രാഷ്ട്രീയ നേതാക്കളും സർക്കാർ പ്രതിനിധികളും സ്ഥലത്തെത്തി സ്ഥിതിഗതികൾ വിലയിരുത്തി.
