സവർക്കറുടെ ജീവിതം പ്രമേയമാക്കിയ ‘സ്വതന്ത്ര്യ വീർ സവർക്കർ’ എന്ന ചിത്രത്തിന് ബോളിവുഡിൽ നിന്ന് യാതൊരു പിന്തുണയും ലഭിച്ചില്ലെന്ന് നടനും സംവിധായകനുമായ രണ്‍ദീപ് ഹൂഡ വെളിപ്പെടുത്തി. ചിത്രത്തിൽ കേന്ദ്ര കഥാപാത്രത്തെ അവതരിപ്പിക്കുകയും സംവിധാനം ചെയ്യുകയും ചെയ്തത് രണ്‍ദീപ് ഹൂഡയാണ്. ജീവചരിത്ര ചിത്രങ്ങൾക്ക് പുതിയ ഭാവുകത്വം നൽകാൻ തനിക്ക് സാധിച്ചെന്നും അദ്ദേഹം പറഞ്ഞു. എന്നാൽ നിർമ്മാതാവ് സാജിദ് നാദിയാവാല തന്നെ സഹായിച്ചതായി രണ്‍ദീപ് ഹൂഡ സമ്മതിച്ചു.
ചിത്രം പൂർത്തീകരിക്കുന്നതിന് വേണ്ടി തന്റെ സ്വത്തുക്കൾ വിൽക്കേണ്ടി വന്നതായി രണ്‍ദീപ് ഹൂഡ നേരത്തെ വെളിപ്പെടുത്തിയിരുന്നു. പണവുമായി ബന്ധപ്പെട്ട പ്രശ്നങ്ങൾ ഉണ്ടായിരുന്നതായും, തന്റെ പിതാവ് മുംബൈയിൽ വാങ്ങിയ സ്വത്തുക്കൾ ഈ സിനിമയ്ക്കായി വിറ്റതായും അദ്ദേഹം പറഞ്ഞു. സവർക്കറെ അവതരിപ്പിക്കുന്നതിന്റെ ഭാഗമായി 18 കിലോയോളം ഭാരം കുറയ്ക്കേണ്ടി വന്നതായും രണ്‍ദീപ് ഹൂഡ വ്യക്തമാക്കി. താൻ പ്രേക്ഷകർക്ക് വേണ്ടിയാണ് ചിത്രം ചെയ്യുന്നതെന്നും, ബോളിവുഡിന് വേണ്ടിയല്ലെന്നും അദ്ദേഹം കൂട്ടിച്ചേർത്തു.
