രാഹുൽ ഗാന്ധിയുടെ പാർലമെന്റ് പ്രസംഗത്തിലെ ഹിന്ദു പരാമർശം വിവാദമായി. ഹിന്ദുക്കളെയും ഹിന്ദു സംസ്കാരത്തെയും അപമാനിച്ചതിന് രാഹുൽ മാപ്പ് പറയണമെന്ന് ബിജെപി സംസ്ഥാന അധ്യക്ഷൻ കെ. സുരേന്ദ്രൻ ആവശ്യപ്പെട്ടു. ഹിന്ദുക്കൾ അക്രമകാരികളും അസത്യപ്രചാരകരുമാണെന്നാണ് രാഹുൽ പറഞ്ഞതെന്ന് സുരേന്ദ്രൻ ആരോപിച്ചു. തെരഞ്ഞെടുപ്പ് പരാജയത്തിന്റെ പേരിൽ ഹിന്ദുക്കളെ കുറ്റപ്പെടുത്തുകയാണെന്നും അദ്ദേഹം കുറ്റപ്പെടുത്തി.
പാർലമെന്റിൽ ഭഗവാൻ പരമശിവനെ അവഹേളിക്കുന്ന പ്രവൃത്തിയാണ് രാഹുൽ നടത്തിയതെന്ന് സുരേന്ദ്രൻ പറഞ്ഞു. ചിൻമുദ്ര സങ്കൽപ്പത്തെ രാഷ്ട്രീയ നേട്ടത്തിനായി കോൺഗ്രസ് വികലമാക്കി അവതരിപ്പിക്കുകയാണെന്നും അദ്ദേഹം ആരോപിച്ചു. ഹിന്ദു ദൈവങ്ങൾ ആയുധമേന്തിയത് ധർമ്മം സംരക്ഷിക്കാനാണെന്നും എന്നാൽ രാഹുൽ അത് തെറ്റായി വ്യാഖ്യാനിക്കുകയാണെന്നും സുരേന്ദ്രൻ കൂട്ടിച്ചേർത്തു. വർഗീയവാദികളെ പ്രീണിപ്പിക്കാനാണ് രാഹുൽ ഹിന്ദുക്കളെ അവഹേളിക്കുന്നതെന്നും അദ്ദേഹം ആരോപിച്ചു.
