പീഡനക്കേസ് പ്രതിയായ സിപിഐഎം നേതാവിനെ അതിജീവിത പിന്തുണച്ചു. തന്നെ ആരും പീഡിപ്പിച്ചിട്ടില്ലെന്നും തന്റെ കുഞ്ഞിന്റെ അച്ഛൻ സി.സി. സജിമോൻ അല്ലെന്നും യുവതി വ്യക്തമാക്കി. രാഷ്ട്രീയ ലാഭത്തിനായി തന്നെ കേസിൽ വലിച്ചിഴച്ചതാണെന്നും, ജില്ലാ സെക്രട്ടറിയേറ്റ് അംഗം ആർ. സനൽകുമാറും തന്റെ സഹോദരനും സജിമോനെ കേസിൽ കുടുക്കിയതാണെന്ന് സംശയിക്കുന്നതായും അവർ പറഞ്ഞു.
2017-ൽ വിവാഹിതയെ പീഡിപ്പിച്ച് ഗർഭിണിയാക്കിയെന്ന കേസിലാണ് സിപിഐഎം തിരുവല്ല നോർത്ത് ലോക്കൽ കമ്മിറ്റി അംഗം സി.സി. സജിമോൻ പ്രതിയായത്. എന്നാൽ, താൻ ആർക്കും സജിമോനെതിരെ പരാതി നൽകിയിട്ടില്ലെന്നും, തന്റെ സഹോദരന്റെ പരാതി എന്താണെന്ന് അറിയില്ലെന്നും യുവതി വെളിപ്പെടുത്തി. സിപിഐഎം സംസ്ഥാന സെക്രട്ടറിയെ നേരിൽ കണ്ട് വിവരം ധരിപ്പിച്ചതായും, ഇനിയും തന്നെ ഈ കേസിലേക്ക് വലിച്ചിടാൻ ശ്രമിച്ചാൽ നിയമനടപടി സ്വീകരിക്കുമെന്നും അവർ മുന്നറിയിപ്പ് നൽകി. പീഡനക്കേസ് പ്രതിയായ സജിമോനെ പാർട്ടി തിരിച്ചെടുത്ത രാഷ്ട്രീയ വിവാദം കത്തിനിൽക്കുമ്പോഴാണ് യുവതി സജിമോന് അനുകൂലമായി രംഗത്തെത്തിയത്.
