സർക്കാർ, എയ്‌ഡഡ്‌ കോളേജുകളിലെ നാലുവർഷ ബിരുദ പഠനത്തിന്റെ ആരംഭത്തോടെ അധ്യാപക തസ്തികകൾ നിലനിർത്തുമെന്ന് സർക്കാർ വ്യക്തമാക്കി. ധനകാര്യ മന്ത്രി കെ.എൻ. ബാലഗോപാലും ഉന്നത വിദ്യാഭ്യാസ മന്ത്രി ആർ. ബിന്ദുവും തമ്മിൽ നടന്ന ചർച്ചയിലാണ് ഈ തീരുമാനമെടുത്തത്. തിങ്കളാഴ്ച തുടങ്ങുന്ന ആദ്യ ബാച്ചിന്റെ പഠനം പൂർത്തിയാകുന്നതുവരെ നിലവിലുള്ള സേവന വ്യവസ്ഥകളും തസ്തികകളും തുടരുമെന്നും അറിയിച്ചു. വിദ്യാർഥികൾക്ക് ആവശ്യമായ മേജർ, മൈനർ, ഫൗണ്ടേഷൻ കോഴ്സുകൾ നൽകുന്നതിന് ഗസ്റ്റ് അധ്യാപകരുടെ സേവനം ഉറപ്പാക്കാനും തീരുമാനിച്ചു. സംസ്ഥാനത്തെ ഉന്നത വിദ്യാഭ്യാസ മേഖലയിലെ സുപ്രധാന നാഴികക്കല്ലായി കണക്കാക്കുന്ന നാലുവർഷ ബിരുദ പ്രോഗ്രാമുകൾ ജൂലൈ ഒന്നിന് ആരംഭിക്കും. ‘വിജ്ഞാനോത്സവം’ എന്ന പേരിൽ ക്യാമ്പസുകളിൽ ആഘോഷങ്ങൾ സംഘടിപ്പിക്കാനും ഉന്നത വിദ്യാഭ്യാസ വകുപ്പ് തീരുമാനിച്ചിട്ടുണ്ട്.
