തമിഴ്നാട്ടിലെ പടക്ക നിർമാണശാലയിൽ ഉണ്ടായ പൊട്ടിത്തെറിയിൽ നാലു പേർ മരിച്ചു. വിരുദുനഗർ ജില്ലയിലെ ബന്ധുവാർപെട്ടിയിലാണ് ദാരുണമായ സംഭവം അരങ്ങേറിയത്. രാവിലെ എട്ടു മണിയോടെ തൊഴിലാളികൾ വെടിമരുന്ന് നിറയ്ക്കുന്നതിനിടെയാണ് പൊട്ടിത്തെറി ഉണ്ടായത്. മൂന്നു കെട്ടിടങ്ങളിലായി പത്തിലധികം തൊഴിലാളികൾ ഉണ്ടായിരുന്നു എന്നാണ് റിപ്പോർട്ട്. ആദ്യ കെട്ടിടത്തിൽ സ്ഫോടനം ഉണ്ടായപ്പോൾ തന്നെ മറ്റുള്ളവർ പുറത്തേക്ക് ഓടി രക്ഷപ്പെട്ടു.
മാരിസ്വാമി, രാജ്കുമാർ, മോഹൻ, ശെൽവകുമാർ എന്നീ ബന്ധുവാർപെട്ടി സ്വദേശികളാണ് മരണത്തിന് ഇരയായത്. രണ്ടുപേർക്ക് ഗുരുതരമായി പരിക്കേറ്റു. സമീപവാസികൾ എത്തിയാണ് പരിക്കേറ്റവരെ ആശുപത്രിയിലേക്ക് മാറ്റിയത്. സ്ഫോടനത്തിൽ പടക്ക നിർമാണശാലയുടെ ഭാഗമായ മൂന്നു കെട്ടിടങ്ങളും പൂർണമായി തകർന്നു. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്. രക്ഷാപ്രവർത്തനങ്ങൾ തുടരുകയാണ്.
വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here
