Gouri Kishan slams body shaming during film promotion, gets support

കൊച്ചി◾: സിനിമാ പ്രൊമോഷന്റെ ഭാഗമായി നടന്ന വാർത്താ സമ്മേളനത്തിൽ, ശരീരത്തെക്കുറിച്ച് മോശമായി സംസാരിച്ച യൂട്യൂബർക്ക് തക്ക മറുപടി നൽകി നടി ഗൗരി കിഷൻ. ശരീരഭാരത്തെക്കുറിച്ചുള്ള ചോദ്യം വിഡ്ഢിത്തമാണെന്ന് ഗൗരി തുറന്നടിച്ചു. ഇതോടെ ഗൗരിക്ക് പിന്തുണയുമായി നിരവധി പേർ രംഗത്തെത്തി.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ഗൗരി കിഷന്റെ പ്രതികരണത്തിന് പിന്നാലെ നിരവധി പേരാണ് സോഷ്യൽ മീഡിയയിൽ പിന്തുണയുമായി എത്തുന്നത്. നടിമാർ മെലിഞ്ഞിരിക്കണമെന്നുണ്ടോ എന്നും ഗൗരി വാർത്താസമ്മേളനത്തിൽ ചോദിച്ചു. എന്നാൽ തന്റെ ചോദ്യത്തിൽ എന്താണ് തെറ്റുള്ളതെന്ന രീതിയിൽ യൂട്യൂബർ ന്യായീകരണം തുടർന്നു. നിങ്ങൾ മോശം ചോദ്യമാണ് ചോദിക്കുന്നതെന്ന് ഗൗരി ആവർത്തിച്ചു പറഞ്ഞു.

ബോഡി ഷെയിമിങ് സാധാരണവൽക്കരിക്കുന്നത് തെറ്റാണെന്ന് ഗൗരി വ്യക്തമാക്കി. നിങ്ങളുടെ ചോദ്യത്തിൽ തനിക്ക് ക്യൂട്ട്നെസ്സ് ഒന്നും കാണാൻ സാധിക്കുന്നില്ലെന്നും ഗൗരി യൂട്യൂബറെ അറിയിച്ചു. എന്തുകൊണ്ടാണ് കഥാപാത്രത്തെക്കുറിച്ചോ സിനിമയിലെ അഭിനയത്തെക്കുറിച്ചോ ചോദിക്കാത്തതെന്നും നടി ചോദിച്ചു. നടിമാരുടെ ഭാരം അറിഞ്ഞിട്ട് നിങ്ങൾക്ക് എന്താണ് നേടാനുള്ളതെന്നും ഗൗരി ചോദിച്ചു.

സിനിമയിൽ ഗൗരിയെ എടുത്ത് ഉയർത്തിയപ്പോൾ അവരുടെ ഭാരം എത്രയായിരുന്നു എന്ന് നടനോട് യൂട്യൂബർ ചോദിച്ചു. ഉയരം കുറഞ്ഞ ഇവരെ എന്തിനാണ് സിനിമയിലേക്ക് കാസ്റ്റ് ചെയ്തതെന്നും സംവിധായകനോട് ഇയാൾ ചോദിച്ചു. ഈ ചോദ്യമാണ് ഗൗരിയെ ചൊടിപ്പിച്ചത്.

അതേസമയം, വാർത്താസമ്മേളനത്തിൽ ഗൗരിക്ക് ഒപ്പമുണ്ടായിരുന്ന സംവിധായകൻ അബിൻ ഹരിഹരനും നായകൻ ആദിത്യ മാധവനും മൗനം പാലിച്ചു. ഗൗരി പ്രതികരിച്ചപ്പോൾ യൂട്യൂബറെ സമാധാനിപ്പിക്കാനും പ്രശ്നം ഉണ്ടാക്കരുതെന്ന് പറയാനുമാണ് സംവിധായകനും നടനും ശ്രമിച്ചത്.

വാർത്താസമ്മേളനത്തിന്റെ വീഡിയോ പുറത്തുവന്നതോടെ ഗൗരിക്ക് പിന്തുണയുമായി നിരവധിപേർ രംഗത്തെത്തി. ഗായിക ചിന്മയി, മാധ്യമപ്രവർത്തക ധന്യ രാജേന്ദ്രൻ, നടിമാരായ റീബ ജോൺ, അനുമോൾ, നൈല ഉഷ, സാനിയ ഈയ്യപ്പൻ, അഹാന കൃഷ്ണ, സംവിധായിക ഇന്ദു തുടങ്ങിയവർ ഗൗരിക്ക് പിന്തുണ അറിയിച്ചു. കൃത്യവും വ്യക്തവുമായി മറുപടി നൽകിയ ഗൗരിക്ക് അഭിനന്ദന പ്രവാഹമാണ് സോഷ്യൽ മീഡിയയിൽ ലഭിക്കുന്നത്.

Story Highlights: സിനിമാ പ്രൊമോഷനിടെ ബോഡി ഷെയിമിങ് നടത്തിയ യൂട്യൂബർക്ക് ചുട്ട മറുപടി നൽകി നടി ഗൗരി കിഷൻ, താരത്തിന് പിന്തുണയുമായി നിരവധിപേർ രംഗത്ത്.