Jack Dorsey's BitChat: Send Messages Without Internet or Phone Network

സോഷ്യൽ മീഡിയാ രംഗത്ത് പുതിയ വെല്ലുവിളിയുമായി ട്വിറ്റർ സഹസ്ഥാപകൻ ജാക്ക് ഡോർസി ബിറ്റ്ചാറ്റ് എന്ന പുതിയ മെസ്സേജിങ് ആപ്ലിക്കേഷനുമായി രംഗത്ത്. നിലവിലുള്ള മെസ്സേജിങ് ആപ്പുകളിൽ നിന്ന് വ്യത്യസ്തമായ പ്രവർത്തന രീതികളാണ് ഇതിന്റെ പ്രധാന ആകർഷണം. ഇന്റർനെറ്റോ ഫോൺ നെറ്റ്വർക്കോ ഇല്ലാതെ സന്ദേശങ്ങൾ അയക്കാൻ സാധിക്കുന്ന സംവിധാനമാണ് ബിറ്റ്ചാറ്റിന്റെ പ്രധാന പ്രത്യേകത.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ബിറ്റ്ചാറ്റ് പ്രധാനമായും ബ്ലൂടൂത്ത് ലോ എനർജി മെഷ് ഉപയോഗിച്ചാണ് പ്രവർത്തിക്കുന്നത്. സ്മാർട്ട്ഫോണുകൾക്ക് തദ്ദേശീയ ക്ലസ്റ്ററുകൾ രൂപീകരിച്ച്, ഉപകരണത്തിൽ നിന്ന് ഉപകരണത്തിലേക്ക് എൻക്രിപ്റ്റ് ചെയ്ത സന്ദേശങ്ങൾ കൈമാറ്റം ചെയ്യപ്പെടുന്നു. ബ്ലൂടൂത്ത് ഉപയോഗിക്കുന്നതിനാൽ വൈഫൈയോ സെല്ലുലാർ നെറ്റ്വർക്കോ ഇല്ലാതെ സന്ദേശങ്ങൾ അയക്കാൻ സാധിക്കുന്നു. നെറ്റ്വർക്ക് ലഭ്യമല്ലാത്ത പ്രദേശങ്ങളിലും, ഇന്റർനെറ്റ് നിയന്ത്രണങ്ങളുള്ള ഇടങ്ങളിലും ഈ ആപ്ലിക്കേഷൻ കൂടുതൽ പ്രയോജനകരമാകും.

ബിറ്റ്ചാറ്റിന്റെ പരിധി ഏകദേശം 100 മീറ്റർ ആണെങ്കിലും, 300 മീറ്റർ വരെ സന്ദേശങ്ങൾ കൈമാറാൻ ഇതിന് സാധിക്കുമെന്നാണ് ഡോർസിയുടെ അവകാശവാദം. സുരക്ഷിതമായ ഗ്രൂപ്പ് ചാറ്റ് ഫീച്ചറുകളും, ഉപയോക്താവ് ഓഫ് ലൈനിൽ ആണെങ്കിൽ പോലും സന്ദേശം അയക്കാനാവുന്ന സ്റ്റോർ ആൻഡ് ഫോർവേഡ് ഫീച്ചറുകളും ഇതിന്റെ സവിശേഷതകളാണ്. വരും അപ്ഡേറ്റുകളിൽ വൈഫൈ ഡയറക്ട് ഫീച്ചർ കൂടി ഉൾപ്പെടുത്താൻ സാധ്യതയുണ്ട്.

ഉപയോക്താക്കളുടെ സ്വകാര്യതയ്ക്ക് പ്രാധാന്യം നൽകുന്ന ഒരു രൂപകൽപ്പനയാണ് ബിറ്റ്ചാറ്റിന്റേത്. സന്ദേശങ്ങൾ സെർവറുകളിൽ ശേഖരിക്കുന്നതിന് പകരം ഫോണുകളിൽ തന്നെ സൂക്ഷിക്കുകയും, പിന്നീട് സ്വയം നീക്കം ചെയ്യപ്പെടുന്ന രീതിയിലുമാണ് ഇത് പ്രവർത്തിക്കുന്നത്. സെൻസർഷിപ്പ് പ്രതിരോധത്തിനും ഇത് മുൻഗണന നൽകുന്നു.

വാട്ട്സ്ആപ്പ്, ടെലഗ്രാം പോലുള്ള ആപ്ലിക്കേഷനുകളിൽ നിന്ന് വ്യത്യസ്തമായി ഫോൺ നമ്പറോ ഇമെയിൽ അക്കൗണ്ടോ ഉപയോഗിച്ച് സൈൻ അപ്പ് ചെയ്യേണ്ടതില്ല. വാട്സാപ്പും ടെലഗ്രാമുമൊക്കെ ഉപഭോക്താക്കളുടെ ഡേറ്റ വൻതോതിൽ ഉപയോഗിക്കുന്ന സാഹചര്യത്തിൽ, അക്കൗണ്ട് പോലുമില്ലാതെ ഉപയോഗിക്കാമെന്നുള്ളത് ബിറ്റ്ചാറ്റിന്റെ സ്വീകാര്യത വർദ്ധിപ്പിക്കും.

ഇന്റർനെറ്റ് ഇല്ലാത്തതിനാൽ കൂടുതൽ സ്വകാര്യത നൽകാൻ ബിറ്റ്ചാറ്റിന് സാധിക്കുമെന്നാണ് വിലയിരുത്തൽ. അതിനാൽത്തന്നെ, നിലവിലെ സാഹചര്യത്തിൽ ബിറ്റ്ചാറ്റിന് മികച്ച സ്വീകാര്യത ലഭിക്കുമെന്നാണ് പ്രതീക്ഷിക്കപ്പെടുന്നത്.

Also read: ഫോക്സ്കോണ് തിരിച്ചുവിളിച്ചത് ഇന്ത്യയിലെ ഐഫോണ് ഫാക്ടറികളില് നിന്ന് നൂറുകണക്കിന് ചൈനീസ് എഞ്ചിനീയര്മാരെ; ഐഫോണ് 17 നിര്മാണത്തിന് വൻ തിരിച്ചടി ?

Story Highlights: ട്വിറ്റർ സഹസ്ഥാപകൻ ജാക്ക് ഡോർസി, ഇന്റർനെറ്റോ ഫോൺ നെറ്റ്വർക്കോ ഇല്ലാതെ സന്ദേശങ്ങൾ അയക്കാൻ കഴിയുന്ന ബിറ്റ്ചാറ്റ് എന്ന പുതിയ മെസ്സേജിങ് ആപ്ലിക്കേഷനുമായി രംഗത്ത്.