Biodegradable Plastics: Japanese Researchers Find Solution to Plastic Pollution

പ്ലാസ്റ്റിക് മലിനീകരണം പരിഹരിക്കാൻ ജാപ്പനീസ് ഗവേഷകരുടെ പുതിയ കണ്ടുപിടുത്തം. സമുദ്രജലത്തിൽ വേഗത്തിൽ ലയിക്കുന്ന ബയോ ഡീഗ്രേഡബിൾ പ്ലാസ്റ്റിക്കുകൾ വികസിപ്പിച്ച് ടോക്കിയോ സർവകലാശാലയിലെയും റൈക്കൻ സെന്റർ ഫോർ എമർജന്റ് മാറ്റർ സയൻസിലെയും ശാസ്ത്രജ്ഞർ. ഈ കണ്ടുപിടിത്തം എല്ലാ മേഖലയ്ക്കും മുതൽക്കൂട്ടായിരിക്കുമെന്നും സുസ്ഥിര മാലിന്യ നിർമ്മാർജ്ജനത്തിന് ഇത് ഉപകരിക്കുമെന്നും ഗവേഷകർ പറയുന്നു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ഭൂമിയിലെ ഏറ്റവും വലിയ പാരിസ്ഥിതിക പ്രശ്നങ്ങളിലൊന്നാണ് പ്ലാസ്റ്റിക് മലിനീകരണം. ഈ പ്രശ്നം മനുഷ്യരെ മാത്രമല്ല, എല്ലാ ജീവജാലങ്ങളെയും ഒരുപോലെ ബാധിക്കുന്നു. ഇതിന് ഒരു പരിഹാരമെന്നോണം ജാപ്പനീസ് ഗവേഷകർ പുതിയൊരു കണ്ടുപിടുത്തം നടത്തിയിരിക്കുകയാണ്. സമുദ്രത്തിൽ വളരെ വേഗം ലയിക്കുന്ന ബയോ ഡീഗ്രേഡബിൾ പ്ലാസ്റ്റിക്കുകളാണ് ഇവർ വികസിപ്പിച്ചെടുത്തിരിക്കുന്നത്.

സമുദ്രത്തിൽ പ്ലാസ്റ്റിക് മാലിന്യം കുന്നുകൂടുന്നതിന് ഒരു പരിഹാരമാണ് ഈ കണ്ടുപിടിത്തം. ടോക്കിയോ സർവകലാശാലയിലെയും റൈക്കൻ സെന്റർ ഫോർ എമർജന്റ് മാറ്റർ സയൻസിലെയും ശാസ്ത്രജ്ഞർ ചേർന്നാണ് ഇത് വികസിപ്പിച്ചത്. തകുസോ ഐഡയുടെ നേതൃത്വത്തിലുള്ള ഗവേഷകരാണ് ഈ സുപ്രധാന കണ്ടുപിടുത്തം നടത്തിയത്. സൂപ്പർമോളികുലാർ പോളിമറുകൾ എന്നറിയപ്പെടുന്ന വസ്തുക്കളിൽ മൂന്ന് പതിറ്റാണ്ടുകളായി നടത്തിയ പ്രവർത്തനങ്ങളുടെ ഫലമായാണ് ഈ നേട്ടം കൈവരിച്ചത് എന്ന് ഗവേഷകർ പറയുന്നു.

ഞെട്ടിക്കുന്ന കണ്ടെത്തൽ; പ്ലാസ്റ്റിക് കുപ്പികളേക്കാൾ കൂടുതൽ മൈക്രോപ്ലാസ്റ്റിക് ഗ്ലാസ് കുപ്പികളിൽ

ഈ പ്ലാസ്റ്റിക്കിന്റെ പ്രധാന പ്രത്യേകതകൾ എന്തൊക്കെയെന്ന് നോക്കാം. പരമ്പരാഗത പെട്രോളിയം പ്ലാസ്റ്റിക്കുകൾക്ക് തുല്യമായ ശക്തി ഇതിനുണ്ട്. ഇത് വിഷരഹിതവും തീയെ പ്രതിരോധിക്കാൻ ശേഷിയുള്ളതുമാണ്. കൂടാതെ കാർബൺ ഡൈ ഓക്സൈഡ് പുറത്തുവിടുന്നില്ല എന്നതും ഇതിന്റെ സവിശേഷതയാണ്.

ഈ പ്ലാസ്റ്റിക് മണ്ണിലെത്തിയാൽ 10 ദിവസത്തിനുള്ളിൽ നശിക്കുമെന്നും ഗവേഷകർ അവകാശപ്പെടുന്നു. അതുപോലെ വിഘടന പ്രക്രിയയിലൂടെ മണ്ണിന്റെ ഫലഭൂയിഷ്ടി മെച്ചപ്പെടുത്തുമെന്നും അവർ കൂട്ടിച്ചേർത്തു. ഈ കണ്ടുപിടിത്തം എല്ലാ മേഖലയ്ക്കും ഒരു മുതൽക്കൂട്ടായിരിക്കും. സുസ്ഥിരമായ മാലിന്യ നിർമ്മാർജ്ജനത്തിനും ഇത് സഹായിക്കുമെന്നും അവർ അഭിപ്രായപ്പെട്ടു.

ഈ പ്ലാസ്റ്റിക്കുകൾ ഉപ്പുമായി സമ്പർക്കം പുലർത്തുമ്പോൾ തന്നെ വിഘടിക്കാൻ തുടങ്ങും. മാത്രമല്ല, ഇത് യാതൊരുവിധ അവശിഷ്ട്ടങ്ങളും ബാക്കിവെക്കുന്നില്ല. ടോക്കിയോക്കടുത്തുള്ള വാക്കോയിലെ ലാബിൽ നടത്തിയ പരീക്ഷണം വിജയകരമായിരുന്നുവെന്ന് ഗവേഷകർ അറിയിച്ചു.

വീട്ടാവശ്യങ്ങൾക്ക് മുതൽ എല്ലാ മേഖലയിലും ഈ പ്ലാസ്റ്റിക് ഉപയോഗിക്കാൻ സാധിക്കും. കാരണം മഴവെള്ളത്തിലും വായുവിലും ഭക്ഷണത്തിൽ പോലും പ്ലാസ്റ്റിക് കണങ്ങൾ കണ്ടെത്തിയിട്ടുണ്ട്. അതിനാൽ പ്ലാസ്റ്റിക് മാലിന്യം ഇല്ലാതാക്കാൻ ഇത് സഹായിക്കും.

Story Highlights: സമുദ്രത്തിൽ വേഗത്തിൽ ലയിക്കുന്ന ബയോ ഡീഗ്രേഡബിൾ പ്ലാസ്റ്റിക്കുകൾ കണ്ടുപിടിച്ച് ജാപ്പനീസ് ഗവേഷകർ.