സന്ദീപ് ജി വാര്യരെ അനുനയിപ്പിക്കാൻ ആർഎസ്എസ് ഇടപെടൽ; അടച്ചിട്ട മുറിയിൽ ചർച്ച

ആർഎസ്എസ് നേതാക്കൾ സന്ദീപ് ജി വാര്യരെ അനുനയിപ്പിക്കാൻ ശ്രമിച്ചു. ആർഎസ്എസ് വിശേഷ് സമ്പർക് പ്രമുഖ് എ ജയകുമാറും ബിജെപി നേതാവ് പി.ആർ ശിവശങ്കറും ഉൾപ്പെടെയുള്ള നേതാക്കൾ സന്ദീപിൻ്റെ വീട്ടിലെത്തി അടച്ചിട്ട മുറിയിൽ ചർച്ച നടത്തി. പാർട്ടി വിടരുതെന്ന് ആവശ്യപ്പെടാനായിരുന്നു നേതാക്കളുടെ സന്ദർശനം. കഴിഞ്ഞ കുറച്ച് ദിവസമായി പാർട്ടിയോട് ഇടഞ്ഞിരുന്ന സന്ദീപ് ഇത്ര പെട്ടെന്ന് പരസ്യനിലപാട് എടുക്കുമെന്ന് നേതാക്കൾ പ്രതീക്ഷിച്ചിരുന്നില്ല. പാലക്കാട്ടെ സ്ഥാനാർത്ഥിയെയും സംസ്ഥാന നേതൃത്വത്തെയും വിമർശിച്ച സന്ദീപിൻറെ നടപടി കടുത്ത അച്ചടക്കലംഘനമായി പാർട്ടി കണക്കാക്കുന്നു. എൻഡിഎ കൺവെൻഷൻ വേദിയിൽ സീറ്റ് കിട്ടാത്തതല്ല സന്ദീപിൻറെ യഥാർത്ഥ പ്രശ്നം. ആഗ്രഹിച്ചിരുന്ന പാലക്കാട് സീറ്റ് നൽകാത്തത് അദ്ദേഹത്തെ കൂടുതൽ പ്രകോപിപ്പിച്ചു. നേരത്തെ ചില പരാതികളുടെ പേരിൽ സന്ദീപിനെ പാർട്ടി വക്താവ് സ്ഥാനത്ത് നിന്നടക്കം ചുമതലകളിൽ നിന്ന് മാറ്റിയിരുന്നു. സരിൻറെ വഴിയെ സന്ദീപും എത്തട്ടെ എന്നാണ് സിപിഎം നിലപാട്. ബിജെപി വിടുമെന്ന് സന്ദീപ് അറിയിച്ചാൽ അപ്പോൾ സ്വീകരിക്കാനാണ് തീരുമാനം. ഈ സാഹചര്യത്തിലാണ് സന്ദീപിനെ പാർട്ടിയിൽ നിലനിർത്താൻ ആർഎസ്എസും ബിജെപിയും ശ്രമിക്കുന്നത്. Story Highlights: RSS leaders attempt to reconcile with Sandeep Warrier amid party tensions