KERALA
ലഹരിവിരുദ്ധ ക്യാമ്പയിൻ ശക്തമാക്കാൻ ഇന്ന് സർവകക്ഷിയോഗം
ലഹരിവിരുദ്ധ പ്രവർത്തനങ്ങൾ ശക്തിപ്പെടുത്തുന്നതിനായി മുഖ്യമന്ത്രിയുടെ അധ്യക്ഷതയിൽ ഇന്ന് സർവകക്ഷിയോഗം ചേരും. ലഹരി ഉപയോഗവും വ്യാപനവും തടയുന്നതിനുള്ള ബോധവൽക്കരണ പ്രവർത്തനങ്ങളും നടപടികളും ചർച്ച ചെയ്യും. മതമേലധ്യക്ഷന്മാരുടെ യോഗവും ഇന്ന് ചേരുന്നുണ്ട്.
സിബിഐ അന്വേഷണത്തിന് പിന്നാലെ കെ എം എബ്രഹാം മുഖ്യമന്ത്രിക്ക് കത്ത്
വരവിൽ കവിഞ്ഞ സ്വത്ത് സമ്പാദന കേസിൽ സിബിഐ അന്വേഷണ ഉത്തരവിന് പിന്നാലെ മുഖ്യമന്ത്രി പിണറായി വിജയന് കത്തയച്ച് കിഫ്ബി സിഇഒ കെ എം എബ്രഹാം. തനിക്കെതിരെ ഗൂഢാലോചന നടന്നുവെന്ന് കെ എം എബ്രഹാം കത്തിൽ ആരോപിച്ചു. ഐപിഎസ് ഉദ്യോഗസ്ഥന്റെ നേതൃത്വത്തിലുള്ള സംഘം ഗൂഢാലോചന അന്വേഷിക്കണമെന്നും കത്തിൽ ആവശ്യപ്പെടുന്നു.
മുനമ്പം വിഷയം: ബിജെപി വർഗീയ ധ്രുവീകരണത്തിന് ശ്രമിക്കുന്നു – മന്ത്രി പി. രാജീവ്
മുനമ്പം വിഷയത്തിൽ ബിജെപിയുടെ നിലപാട് സങ്കീർണമാക്കുന്നതാണെന്ന് മന്ത്രി പി. രാജീവ്. വർഗീയ ധ്രുവീകരണത്തിന് ശ്രമിക്കുന്നതായി അദ്ദേഹം ആരോപിച്ചു. ജുഡീഷ്യൽ കമ്മീഷൻ റിപ്പോർട്ടിന്റെ അടിസ്ഥാനത്തിൽ മുനമ്പം പ്രശ്നത്തിന് ശാശ്വത പരിഹാരം കാണാൻ സർക്കാർ ശ്രമിക്കും.
മലയാറ്റൂർ പള്ളിയിൽ മൊബൈൽ മോഷണം: പ്രതി പിടിയിൽ
മലയാറ്റൂർ പള്ളിയിൽ തീർത്ഥാടകരുടെ മൊബൈൽ ഫോണുകൾ മോഷ്ടിച്ച കേസിൽ പ്രതി അറസ്റ്റിലായി. ആലപ്പുഴ സ്വദേശിയായ അബ്ബാസ് സൈനുദീൻ ആണ് പിടിയിലായത്. ഉറങ്ങിക്കിടക്കുന്ന തീർത്ഥാടകരുടെ ഫോണുകളാണ് പ്രതി മോഷ്ടിച്ചിരുന്നത്.
അപൂർവ്വ രോഗ ചികിത്സയ്ക്ക് വിഷുക്കൈനീട്ടം പദ്ധതിയുമായി ആരോഗ്യ വകുപ്പ്
കുട്ടികളിലെ അപൂർവ രോഗ ചികിത്സയ്ക്കായി സർക്കാർ 'വിഷുക്കൈനീട്ടം' പദ്ധതി ആരംഭിച്ചു. ആരോഗ്യ മന്ത്രി വീണ ജോർജ് പദ്ധതിയിലേക്ക് സംഭാവനകൾ അഭ്യർത്ഥിച്ചു. ആരോഗ്യ വകുപ്പ് സെക്രട്ടറിയുടെ പേരിലാണ് അക്കൗണ്ട് ആരംഭിച്ചിരിക്കുന്നത്.
അമ്മയും രണ്ട് പെൺമക്കളും മീനച്ചിലാറ്റിൽ ചാടി മരിച്ച നിലയിൽ
കോട്ടയം നീറിക്കാട് മീനച്ചിലാറ്റിൽ അമ്മയും രണ്ട് പെൺമക്കളും മരിച്ച നിലയിൽ കണ്ടെത്തി. മുത്തോലി ഗ്രാമപഞ്ചായത്ത് മുൻ പ്രസിഡന്റും അഭിഭാഷകയുമായ ജിസ്മോൾ തോമസും മക്കളായ അഞ്ചുവയസ്സുകാരി നേഹയും രണ്ടുവയസ്സുകാരി പൊന്നുവുമാണ് മരിച്ചത്. കുടുംബ പ്രശ്നങ്ങളാണ് ആത്മഹത്യയ്ക്ക് കാരണമെന്ന് സംശയിക്കുന്നു.
വേനൽക്കാലത്ത് അമീബിക് മസ്തിഷ്ക ജ്വരത്തിനെതിരെ ജാഗ്രത പാലിക്കണമെന്ന് ആരോഗ്യ മന്ത്രി
വേനൽക്കാലത്ത് അമീബിക് മെനിഞ്ചോഎൻസെഫലൈറ്റിസ് (അമീബിക് മസ്തിഷ്ക ജ്വരം) എന്ന അപകടകാരിയായ രോഗത്തെക്കുറിച്ച് ജാഗ്രത പാലിക്കണമെന്ന് ആരോഗ്യ മന്ത്രി വീണാ ജോർജ്. കുളങ്ങളിലും ജലാശയങ്ങളിലും കുളിക്കുമ്പോൾ പ്രത്യേകം ശ്രദ്ധിക്കണം. രോഗലക്ഷണങ്ങൾ കണ്ടാൽ ഉടൻ തന്നെ ചികിത്സ തേടേണ്ടത് അത്യാവശ്യമാണ്.
അതിരപ്പിള്ളിയിൽ കാട്ടാനയുടെ ചവിട്ടേറ്റു മരിച്ച ആദിവാസി യുവാവിന്റെ പോസ്റ്റ്മോർട്ടം റിപ്പോർട്ട് പുറത്ത്
കാട്ടാന ചവിട്ടേറ്റാണ് സതീഷിന്റെ മരണമെന്ന് പോസ്റ്റ്മോർട്ടം റിപ്പോർട്ട്. അംബികയുടെ പോസ്റ്റ്മോർട്ടം നടപടികൾ തൃശ്ശൂർ മെഡിക്കൽ കോളേജിൽ പുരോഗമിക്കുന്നു. അതിരപ്പിള്ളിയിൽ നാളെ ജനകീയ ഹർത്താൽ പ്രഖ്യാപിച്ചു.
കിടപ്പുമുറിയിൽ കഞ്ചാവ് കൃഷി; യുവാവ് പിടിയിൽ
കൊല്ലം കരുനാഗപ്പള്ളിയിൽ വീട്ടിലെ കിടപ്പുമുറിയിൽ കഞ്ചാവ് ചെടികൾ വളർത്തിയ യുവാവ് പിടിയിലായി. 21 കഞ്ചാവ് ചെടികളും 5 ഗ്രാം കഞ്ചാവും ആംപ്യൂളുമാണ് പിടികൂടിയത്. കരുനാഗപ്പള്ളി എക്സൈസ് നടത്തിയ പരിശോധനയിലാണ് കഞ്ചാവ് പിടികൂടിയത്.
23 കിലോ കഞ്ചാവുമായി രണ്ട് പേർ പിടിയിൽ
വാളയാര് ചെക്ക് പോസ്റ്റിൽ നടത്തിയ വാഹന പരിശോധനയിൽ 23 കിലോ കഞ്ചാവുമായി രണ്ട് പേരെ എക്സൈസ് സംഘം പിടികൂടി. ഒഡീഷ സ്വദേശികളായ ഇരുവരെയും കോടതിയിൽ ഹാജരാക്കി റിമാൻഡ് ചെയ്തു. പിടികൂടിയ കഞ്ചാവിന് പത്ത് ലക്ഷം രൂപ വിലമതിക്കുമെന്ന് എക്സൈസ് അധികൃതർ അറിയിച്ചു.
മുതലപ്പൊഴി പ്രതിസന്ധി: മന്ത്രിതല ചർച്ച നാളെ
മുതലപ്പൊഴിയിലെ പ്രതിസന്ധി പരിഹരിക്കുന്നതിനായി നാളെ മന്ത്രിതല ചർച്ച നടക്കും. മത്സ്യത്തൊഴിലാളികളെ കൊല്ലത്തേക്ക് മാറ്റുന്നതിൽ സമരസമിതി എതിർപ്പ് പ്രകടിപ്പിച്ചു. ഈസ്റ്ററിന് ശേഷം അനിശ്ചിതകാല സമരം നടത്തുമെന്ന് സമരസമിതി.
ഐഎച്ച്ആർഡി ഫെബ്രുവരി 2025 പരീക്ഷാഫലങ്ങൾ പ്രഖ്യാപിച്ചു
ഐഎച്ച്ആർഡി ഫെബ്രുവരി 2025 ൽ നടത്തിയ പിജിഡിസിഎ, ഡിഡിറ്റിഒഎ, ഡിസിഎ, സിസിഎൽഐഎസ് എന്നീ കോഴ്സുകളുടെ പരീക്ഷാഫലങ്ങൾ പ്രസിദ്ധീകരിച്ചു. പരീക്ഷാഫലവും മാർക്കും അതത് പരീക്ഷാകേന്ദ്രങ്ങളിൽ ലഭ്യമാണ്. പുനർമൂല്യനിർണയത്തിനുള്ള അപേക്ഷകൾ ഏപ്രിൽ 21 വരെ സ്വീകരിക്കും.