Kerala News
വിദ്യാർത്ഥിനിക്ക് അശ്ലീല വീഡിയോ അയച്ചു ഭീഷണി; തൃശൂർ സ്വദേശി അറസ്റ്റിൽ
വിദ്യാർത്ഥിനിക്ക് അശ്ലീല വീഡിയോകളും സന്ദേശങ്ങളും അയച്ച് ഭീഷണിപ്പെടുത്തിയ കേസിൽ തൃശൂർ സ്വദേശി സംഗീത് കുമാറിനെ കോഴിക്കോട് സൈബർ ക്രൈം പോലീസ് അറസ്റ്റ് ചെയ്തു. ഫേസ്ബുക്കിൽ നിന്ന് വിവരങ്ങൾ ശേഖരിച്ച് പെൺകുട്ടികളെ ലക്ഷ്യമിട്ടാണ് ഇയാൾ തട്ടിപ്പ് നടത്തിയിരുന്നത്. പ്രതിയെ കോഴിക്കോട് സി.ജെ.എം. കോടതിയിൽ ഹാജരാക്കിയ ശേഷം 14 ദിവസത്തേക്ക് റിമാൻഡ് ചെയ്തു.
പാലക്കാട് കോങ്ങാട് സ്കൂളിലെ വിദ്യാർത്ഥിനികളെ കാണാനില്ല; പോലീസ് അന്വേഷണം ആരംഭിച്ചു
പാലക്കാട് കോങ്ങാട് കെ.പി.ആർ.പി സ്കൂളിലെ 13 വയസ്സുള്ള രണ്ട് വിദ്യാർത്ഥിനികളെ കാണാനില്ല. വിദ്യാർത്ഥിനികൾ ഒലവക്കോട് റെയിൽവേ സ്റ്റേഷനിൽ നിന്ന് ടിക്കറ്റ് എടുക്കുന്ന സിസിടിവി ദൃശ്യങ്ങൾ പുറത്തുവന്നിട്ടുണ്ട്. എന്തെങ്കിലും വിവരങ്ങൾ ലഭിക്കുന്നവർ 9497947216 എന്ന നമ്പറിൽ അറിയിക്കണമെന്ന് പോലീസ് അറിയിച്ചു.
അമീബിക് മസ്തിഷ്ക ജ്വരം: ആരോഗ്യവകുപ്പിനെതിരെ വിമർശനവുമായി പ്രതിപക്ഷം
അമീബിക് മസ്തിഷ്ക ജ്വരത്തിന്റെ വ്യാപനവുമായി ബന്ധപ്പെട്ട് ആരോഗ്യവകുപ്പിനെതിരെ പ്രതിപക്ഷം വിമർശനം ഉന്നയിച്ചു. മരണനിരക്ക് സർക്കാർ പൂഴ്ത്തിവയ്ക്കുകയാണെന്നും ആരോഗ്യമന്ത്രി മേനിനടിക്കുകയാണെന്നും എൻ. ഷംസുദ്ദീൻ ആരോപിച്ചു. ആരോഗ്യവകുപ്പിന് നിപ്പയുടെയോ അമീബിക് മസ്തിഷ്ക ജ്വരത്തിന്റെയോ ഉറവിടം കണ്ടെത്താൻ സാധിച്ചിട്ടില്ലെന്നും അദ്ദേഹം കുറ്റപ്പെടുത്തി.
കൊല്ലത്ത് ഗർഭിണിയായ യുവതിയെ ഭർതൃവീട്ടുകാർ മർദിച്ചെന്ന് പരാതി
കൊല്ലം ഓച്ചിറയിൽ സ്ത്രീധനത്തിന്റെ പേരിൽ ഗർഭിണിയായ യുവതിയെ ഭർതൃവീട്ടുകാർ മർദിച്ചതായി പരാതി. അഴീക്കൽ സ്വദേശി അക്ഷയയ്ക്കാണ് മർദ്ദനമേറ്റത്. വിവാഹശേഷം സ്ത്രീധനം കുറഞ്ഞുപോയെന്ന് ആരോപിച്ചായിരുന്നു പീഡനം. സംഭവത്തില് ഓച്ചിറ പോലീസ് കേസെടുത്ത് അന്വേഷണം ആരംഭിച്ചു.
ചികിത്സാ പിഴവ്: ഡോക്ടറെ സംരക്ഷിക്കുന്നു; സര്ക്കാര് സംവിധാനങ്ങളില് പ്രതീക്ഷ നഷ്ടപ്പെട്ടെന്ന് സുമയ്യയുടെ കുടുംബം
തിരുവനന്തപുരം ജനറൽ ആശുപത്രിയിൽ ചികിത്സാ പിഴവ് സംഭവിച്ചതിനെ തുടർന്ന് സർക്കാറിന്റെ ഭാഗത്തുനിന്നുള്ള നീതി വൈകുന്നതിൽ പ്രതിഷേധിച്ച് സുമയ്യയുടെ കുടുംബം രംഗത്ത്. ശസ്ത്രക്രിയക്ക് നേതൃത്വം നൽകിയ ഡോക്ടർക്കെതിരെ ഇതുവരെയും നിയമനടപടി സ്വീകരിക്കാത്തതിൽ കുടുംബം അതൃപ്തി അറിയിച്ചു. തെറ്റായ ചികിത്സ നൽകിയ ഡോക്ടർക്കെതിരെ നിയമപരമായി മുന്നോട്ട് പോകുമെന്നും സുമയ്യയുടെ കുടുംബം അറിയിച്ചു.
സിനിമ ഉപേക്ഷിക്കാനാവില്ല; കലുങ്ക് സംവാദം തുടരുമെന്ന് സുരേഷ് ഗോപി
കൊടുങ്ങല്ലൂരിൽ നടന്ന കലുങ്ക് സൗഹൃദ സംവാദത്തിൽ സിനിമ ഉപേക്ഷിക്കാനാവില്ലെന്ന് സുരേഷ് ഗോപി പറഞ്ഞു. കലുങ്ക് സൗഹൃദ സംവാദം 14 ജില്ലകളിലേക്കും വ്യാപിപ്പിക്കുമെന്നും അദ്ദേഹം കൂട്ടിച്ചേർത്തു. നിവേദനം വാങ്ങാതെ മടക്കിയയച്ച കൊച്ചു വേലായുധന്റെ വീട് സി.പി.ഐ.എം നിർമ്മിച്ചു നൽകും.
ആഗോള അയ്യപ്പ സംഗമം; സുപ്രീം കോടതി ഇന്ന് ഇടക്കാല ഉത്തരവിറക്കും
ആഗോള അയ്യപ്പ സംഗമം തടയണമെന്ന് ആവശ്യപ്പെട്ടുള്ള ഹർജിയിൽ സുപ്രീം കോടതി ഇന്ന് ഇടക്കാല ഉത്തരവ് പുറപ്പെടുവിച്ചേക്കും. ജസ്റ്റിസ് പി എസ് നരസിംഹ, ജസ്റ്റിസ് എ എസ് ചന്ദുർക്കർ എന്നിവരടങ്ങുന്ന ബെഞ്ചാണ് ഹർജി പരിഗണിക്കുന്നത്. രാഷ്ട്രീയ ലക്ഷ്യത്തോടെയാണ് അയ്യപ്പ സംഗമം നടത്തുന്നതെന്നും ഹർജിയിൽ ആരോപണമുണ്ട്.
പോലീസ് മർദ്ദനത്തിൽ ഇരയായ തന്നെ മദ്യപസംഘത്തിന്റെ തലവനാക്കാൻ ശ്രമിക്കുന്നതിൽ വേദനയുണ്ടെന്ന് സുജിത്ത്
കുന്നംകുളത്ത് പോലീസ് മർദ്ദനത്തിന് ഇരയായ സുജിത്തിനെതിരെ നിരവധി കേസുകൾ നിലവിലുണ്ടെന്നും മദ്യപസംഘത്തിന്റെ തലവനായി ചിത്രീകരിക്കുന്നതിൽ വേദനയുണ്ടെന്നും സുജിത്ത് വി.എസ്. മുഖ്യമന്ത്രി നിയമസഭയിൽ നടത്തിയ പ്രതികരണം നീതിയുടെ ഭാഷയായി തനിക്ക് തോന്നിയില്ലെന്നും സുജിത്ത് അഭിപ്രായപ്പെട്ടു. കുറ്റക്കാർക്കെതിരെ നടപടി സ്വീകരിച്ചുവെന്ന മുഖ്യമന്ത്രിയുടെ പ്രസ്താവന കാലങ്ങൾക്ക് മുൻപേ നടന്ന സംഭവത്തെക്കുറിച്ചാണ്.
അതുല്യയുടെ മരണത്തിലെ പ്രതിയുടെ ജാമ്യം റദ്ദാക്കാനുള്ള ഹർജിയിൽ വാദം മാറ്റിവെച്ചു
ഷാർജയിൽ ആത്മഹത്യ ചെയ്ത കൊല്ലം സ്വദേശി അതുല്യയുടെ കേസിൽ പ്രതി സതീഷിന്റെ മുൻകൂർ ജാമ്യം റദ്ദാക്കാനുള്ള ഹർജിയിലെ വാദം 23-ലേക്ക് മാറ്റി. ഫൊറൻസിക് പരിശോധനാഫലം വൈകുന്നതാണ് കേസ് മാറ്റാൻ കാരണം. അതുല്യയെ സതീഷ് മർദ്ദിക്കുന്ന ദൃശ്യങ്ങളുടെ പഴക്കം നിർണ്ണയിക്കുന്നതിന് വേണ്ടിയാണ് ഫോറൻസിക് പരിശോധന നടത്തുന്നത്.
ബലാത്സംഗ കേസ്: സിദ്ദിഖിന് വിദേശയാത്രയ്ക്ക് അനുമതി
ബലാത്സംഗക്കേസിൽ ജാമ്യത്തിൽ കഴിയുന്ന നടൻ സിദ്ദിഖിന് വിദേശയാത്രയ്ക്ക് തിരുവനന്തപുരം കോടതി അനുമതി നൽകി. സിനിമാ ഷൂട്ടിംഗിൽ പങ്കെടുക്കുന്നതിന് വിദേശത്തേക്ക് പോകാൻ പാസ്പോർട്ട് വേണമെന്നായിരുന്നു സിദ്ദിഖിന്റെ ആവശ്യം. ഈ മാസം 19 മുതൽ അടുത്ത മാസം 18 വരെയാണ് കോടതി അനുമതി നൽകിയിരിക്കുന്നത്.
പോലീസുകാരുടെ തല അടിച്ചുപൊട്ടിക്കും; കെ.എസ്.യു ജില്ലാ പ്രസിഡന്റ് വി.ടി. സൂരജിന്റെ ഭീഷണി പ്രസംഗം
പോലീസുകാരുടെ തല അടിച്ചുപൊട്ടിക്കുമെന്ന ഭീഷണിയുമായി കെ.എസ്.യു കോഴിക്കോട് ജില്ലാ പ്രസിഡന്റ് വി.ടി സൂരജ്. കുറ്റ്യാടി സി.ഐ കൈലാസനാഥനെയും, കോഴിക്കോട് അസിസ്റ്റന്റ് കമ്മീഷണർ ആയിരുന്ന ബിജുരാജിനെതിരെയും ആയിരുന്നു ഭീഷണി. വി ടി സൂരജിൻ്റെ ഭീഷണി പ്രസംഗത്തിൽ പൊലീസ് കേസെടുക്കും.
മൂവാറ്റുപുഴയിൽ ലഹരി മാഫിയയുടെ പരാതി നൽകിയ ആൾക്കെതിരെ ആക്രമണം; കടയും വാഹനവും തീയിട്ടു
മൂവാറ്റുപുഴയിൽ ലഹരി മാഫിയയുടെ അതിക്രമത്തിനെതിരെ പരാതി നൽകിയ ആൾക്കെതിരെ ആക്രമണം. ആനിക്കാട് സ്വദേശി ഷാഹുൽ ഷിനാജിന്റെ കടയും വാഹനവുമാണ് തീയിട്ട് നശിപ്പിച്ചത്. ലഹരി സംഘത്തിനെതിരെ പരാതി നൽകിയതിലുള്ള വിരോധമാണ് അക്രമത്തിന് പിന്നിലെന്ന് ഷാഹുൽ ഷിനാജ് പറയുന്നു.