Kerala News
തിലകൻ സ്മാരക വേദി അവാർഡുകൾ പ്രഖ്യാപിച്ചു; വയലാർ ശരത്ചന്ദ്ര വർമ്മ അടക്കമുള്ളവർക്ക് പുരസ്കാരം
തിലകൻ സ്മാരക വേദിയുടെ ഈ വർഷത്തെ സമഗ്ര സംഭാവനക്കുള്ള സംസ്ഥാന അവാർഡുകൾ പ്രഖ്യാപിച്ചു. വയലാർ ശരത്ത് ചന്ദ്രവർമ്മ (ഗാന രചന), ആലപ്പി ഋഷികേശ് (നാടക ഗാന സംവിധാനം), അതിരുങ്കൽ സുഭാഷ് (അഭിനയം) എന്നിവർക്കാണ് അവാർഡ്. സെപ്റ്റംബർ 28-ന് റാന്നി പി ജെ ടി ഹാളിൽ വെച്ച് നടക്കുന്ന ചടങ്ങിൽ സാംസ്കാരിക വകുപ്പ് മന്ത്രി സജി ചെറിയാൻ അവാർഡുകൾ വിതരണം ചെയ്യും.
സി.പി.ഐ.എം നേതാവിനെതിരായ സൈബർ ആക്രമണം: കെ.എം. ഷാജഹാന്റെ ചോദ്യം ചെയ്യൽ പൂർത്തിയായി
സി.പി.ഐ.എം നേതാവിനെതിരായ സൈബർ ആക്രമണ കേസിൽ കെ.എം. ഷാജഹാന്റെ ചോദ്യം ചെയ്യൽ പൂർത്തിയായി. മണിക്കൂറുകളോളം ചോദ്യം ചെയ്യൽ നീണ്ടുനിന്നു. കേസിൽ കൂടുതൽ പേരിലേക്ക് അന്വേഷണം നീളാൻ സാധ്യതയുണ്ടെന്ന് സൂചന.
കൊല്ലത്ത് 75 ഗ്രാം എം.ഡി.എം.എ കേസ്: മുഖ്യപ്രതി ഹരിത പിടിയിൽ
കൊല്ലത്ത് 75 ഗ്രാം എം.ഡി.എം.എ പിടികൂടിയ കേസിൽ മുഖ്യപ്രതി ഹരിത അറസ്റ്റിലായി. വിദേശത്തിരുന്ന് ലഹരി കച്ചവടം നിയന്ത്രിച്ചത് ഹരിതയാണെന്ന് പോലീസ് കണ്ടെത്തി. ജില്ലാ ജയിൽ പരിസരത്ത് വെച്ചാണ് പ്രത്യേക സംഘം ഇവരെ അറസ്റ്റ് ചെയ്തത്.
തിരുവനന്തപുരത്ത് സൗജന്യ ഫോട്ടോഗ്രാഫി, വീഡിയോഗ്രാഫി കോഴ്സുകൾ ആരംഭിക്കുന്നു
തിരുവനന്തപുരം സ്റ്റാച്യുവിലുള്ള ഗ്രാമീണ സ്വയംതൊഴിൽ പരിശീലന കേന്ദ്രത്തിൽ ഫോട്ടോഗ്രാഫി, വീഡിയോഗ്രാഫി കോഴ്സുകൾ ആരംഭിക്കുന്നു. ഒക്ടോബർ 3 മുതൽ ക്ലാസുകൾ ആരംഭിക്കും. 18നും 50നും മധ്യേ പ്രായമായവർക്ക് 0471-2322430, 8891228788 എന്നീ നമ്പറുകളിൽ വിളിച്ച് രജിസ്റ്റർ ചെയ്യാവുന്നതാണ്.
ശബരിമല സംരക്ഷണ സംഗമം: ശാന്താനന്ദയ്ക്കെതിരെ കേസ്
ശബരിമല സംരക്ഷണ സംഗമത്തിലെ വിദ്വേഷ പ്രസംഗത്തിൽ ശ്രീരാമദാസ മിഷൻ അധ്യക്ഷൻ ശാന്താനന്ദയ്ക്കെതിരെ പോലീസ് കേസെടുത്തു. വാവർ മുസ്ലീം തീവ്രവാദിയാണെന്നുള്ള പ്രസ്താവന നടത്തിയതിനാണ് കേസ്. ഭാരതീയ നിയമസംഹിതയിലെ പുതിയ നിയമപ്രകാരം ജാമ്യമില്ലാ വകുപ്പുകൾ ചുമത്തിയാണ് കേസ് എടുത്തിരിക്കുന്നത്.
തിരുവനന്തപുരം മെഡിക്കൽ കോളേജിന് പുതിയ സൂപ്രണ്ട്; ഡോ. സി.ജി. ജയചന്ദ്രൻ ചുമതലയേൽക്കും
തിരുവനന്തപുരം മെഡിക്കൽ കോളേജിന് പുതിയ സൂപ്രണ്ടായി ഡോക്ടർ സി.ജി. ജയചന്ദ്രൻ നിയമിതനായി. നിലവിലെ സൂപ്രണ്ട് രാജി അറിയിച്ചതിനെ തുടർന്നാണ് നിയമനം. ആരോഗ്യവകുപ്പ് ഇതുമായി ബന്ധപ്പെട്ട ഉത്തരവ് പുറത്തിറക്കി.
രാജീവ് ചന്ദ്രശേഖറിനെതിരെ പരാതിയുമായി മാധ്യമപ്രവർത്തക
ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിനെതിരെ മാധ്യമപ്രവർത്തകയുടെ പരാതി. കൈരളി ടിവിയിലെ റിപ്പോർട്ടർ സുലേഖയാണ് ഡിജിപിക്ക് പരാതി നൽകിയിരിക്കുന്നത്. ജോലി തടസ്സപ്പെടുത്തിയെന്നും, അപകീർത്തിപ്പെടുത്തിയെന്നും ഭീഷണിപ്പെടുത്തിയെന്നും സുലേഖ പരാതിയിൽ ആരോപിച്ചു.
കെ.ജെ. ഷൈൻ കേസ്: ഗോപാലകൃഷ്ണന്റെ മുൻകൂർ ജാമ്യാപേക്ഷയിൽ കോടതി പോലീസിനോട് റിപ്പോർട്ട് തേടി
സിപിഎം നേതാവ് കെ.ജെ.ഷൈനിനെതിരായ അപവാദ പ്രചരണ കേസിൽ ഒന്നാം പ്രതി ഗോപാലകൃഷ്ണന്റെ മുൻകൂർ ജാമ്യാപേക്ഷയിൽ കോടതി പോലീസിനോട് റിപ്പോർട്ട് തേടി. എറണാകുളം സെഷൻസ് കോടതിയാണ് റിപ്പോർട്ട് തേടിയത്. കെ.ജെ. ഷൈൻ നൽകിയ പരാതിയിൽ കൂടുതൽ ആളുകളെ ചോദ്യം ചെയ്ത ശേഷം ഫോണുകൾ പിടിച്ചെടുത്ത് അന്വേഷണം നടത്തുകയാണ്.
സുകുമാരന് നായരുടെ നിലപാട് ശരി: വെള്ളാപ്പള്ളി നടേശന്
ശബരിമല വിഷയത്തില് എന്എസ്എസ് ജനറല് സെക്രട്ടറി ജി. സുകുമാരന് നായരുടെ നിലപാട് ശരിയാണെന്ന് എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് പറഞ്ഞു. സര്ക്കാരിനെ എന്എസ്എസ് എല്ലാ കാര്യത്തിലും എതിര്ക്കുന്നതായി കരുതുന്നില്ലെന്നും അദ്ദേഹം കൂട്ടിച്ചേര്ത്തു. എല്ഡിഎഫ് സര്ക്കാര് ആചാരം സംരക്ഷിക്കാന് നടപടി എടുക്കുകയാണെന്നും സുകുമാരന് നായര് ഒരു അഭിമുഖത്തില് പറഞ്ഞിരുന്നു.
നെല്ല് സംഭരണം: കുടിശിക തീർക്കാൻ മുഖ്യമന്ത്രിയുടെ അടിയന്തര ഇടപെടൽ; നാളെ യോഗം ചേരും
നെല്ല് സംഭരണത്തിലെ കുടിശ്ശിക തീർക്കാൻ മുഖ്യമന്ത്രി ഇടപെടുന്നു. ഇതിന്റെ ഭാഗമായി വായ്പയെടുത്ത് സംഭരണ കുടിശിക തീർക്കുന്നതുമായി ബന്ധപ്പെട്ട കാര്യങ്ങൾ ചർച്ച ചെയ്യാൻ നാളെ യോഗം വിളിച്ചു. ഭക്ഷ്യ വകുപ്പിന്റെ നേതൃത്വത്തിൽ നടക്കുന്ന യോഗത്തിൽ മുഖ്യമന്ത്രി നേരിട്ട് പങ്കെടുക്കും. കർഷകരുടെ പ്രശ്നങ്ങൾ പരിഹരിക്കുന്നതിൽ സർക്കാർ അതീവ ശ്രദ്ധ ചെലുത്തുന്നു.
തിരുമല അനിലിന്റെ ആത്മഹത്യ: അന്വേഷണം ക്രൈംബ്രാഞ്ചിന് കൈമാറിയേക്കും; മന്ത്രിയുടെ പ്രതികരണം ഇങ്ങനെ
തിരുവനന്തപുരം കോർപ്പറേഷൻ കൗൺസിലർ തിരുമല അനിലിന്റെ ആത്മഹത്യയിൽ ക്രൈംബ്രാഞ്ച് അന്വേഷണത്തിന് സാധ്യത. അനിലിന്റെ മരണത്തിൽ ബിജെപിക്ക് പങ്കുണ്ടെന്ന് മന്ത്രി വി. ശിവൻകുട്ടി ആരോപിച്ചു. അനിൽ പ്രസിഡന്റായ സഹകരണ സംഘത്തിൽ കോടികളുടെ ക്രമക്കേട് കണ്ടെത്തിയതും അന്വേഷണ പരിധിയിൽ വരും.
വയനാട് ഡിസിസി ട്രഷററായിരുന്ന എൻ.എം. വിജയന്റെ കുടിശ്ശിക കോൺഗ്രസ് തീർത്തു
വയനാട് ഡിസിസി ട്രഷററായിരുന്ന എൻ.എം. വിജയന്റെ കുടുംബത്തിന്റെ ബാങ്കിലെ കുടിശ്ശിക കോൺഗ്രസ് തീർത്തു. 60 ലക്ഷം രൂപ കെപിസിസി ബത്തേരി ബാങ്കിൽ അടച്ചു. സാമ്പത്തിക ബാധ്യതകൾ തീർപ്പാക്കാത്തതിൽ പ്രതിഷേധിച്ച് വിജയന്റെ കുടുംബം സത്യഗ്രഹത്തിന് ഒരുങ്ങുന്നതിന് മുന്നേയാണ് പണം അടച്ചത്.