മുംബൈ സിറ്റിക്കെതിരെ വിജയം ലക്ഷ്യമിട്ട് കേരള ബ്ലാസ്റ്റേഴ്സ്

കേരള ബ്ലാസ്റ്റേഴ്സിന്റെ മറ്റൊരു പ്രധാന മത്സരത്തിന് ഇന്ന് മുംബൈയില്‍ വേദിയൊരുങ്ങിയിരിക്കുകയാണ്. ഇന്ത്യന്‍ സൂപ്പര്‍ലീഗ് ഫുട്‌ബോളില്‍ മുംബൈ സിറ്റിയുമായുള്ള എവേ മത്സരത്തില്‍ വിജയം മാത്രമാണ് കേരളം ലക്ഷ്യമിടുന്നത്. രാത്രി ഏഴരയ്ക്ക് മുംബൈ ഫുട്‌ബോള്‍ അരീനയിലാണ് ബ്ലാസ്റ്റേഴ്സ് ഇറങ്ങുന്നത്. ജെസ്യൂസ് ജെമിനസും നോഹ് സദോയിയുമായിരിക്കും ടീമിനെ നയിക്കുക. ഈ സീസണില്‍ ടീം ഒത്തിണക്കത്തോടെ കളിക്കുമ്പോഴും അപ്രതീക്ഷിത തോല്‍വികളിലേക്ക് വീഴേണ്ടി വരുന്നത് ആരാധകരെ നിരാശരാക്കുന്നുണ്ട്. ഇതുവരെ കളിച്ച ആറ് മത്സരങ്ങളില്‍ വെറും രണ്ടെണ്ണത്തില്‍ മാത്രമാണ് ബ്ലാസ്‌റ്റേഴ്‌സിന് വിജയിക്കാനായിട്ടുള്ളത്. രണ്ട് കളിയില്‍ സമനില വഴങ്ങേണ്ടി വന്നപ്പോള്‍ രണ്ടെണ്ണത്തില്‍ തോല്‍വിയായിരുന്നു ഫലം. ബദ്ധവൈരിയായ ബംഗളുരുവുമായുള്ള കഴിഞ്ഞ മത്സരത്തില്‍ 3-1 സ്‌കോറില്‍ തോറ്റ സങ്കടം ബ്ലാസ്‌റ്റേഴ്‌സ് താരങ്ങള്‍ക്കും ആരാധകര്‍ക്കും ഇനിയും മറക്കാനായിട്ടില്ല. ആ മത്സരത്തില്‍ മികച്ച കളി പുറത്തെടുത്തിട്ടും വരുത്തിയ പിഴവുകള്‍ക്കാണ് വലിയ വില നല്‍കേണ്ടി വന്നത്. പലപ്പോഴും പ്രതിരോധപ്പിഴവുകള്‍ തിരിച്ചടിയാകുന്നുണ്ട്. ഈ പിഴവുകള്‍ പരിഹരിച്ച് മുംബൈയ്‌ക്കെതിരെ വിജയം നേടാനാണ് ടീം ലക്ഷ്യമിടുന്നത്. Story Highlights: Kerala Blasters aim for victory against Mumbai City in ISL away match