തിരുവനന്തപുരത്ത് നാലു ദിവസത്തെ ജലക്ഷാമത്തിന് ശേഷം കുടിവെള്ള വിതരണം ഭാഗികമായി പുനഃസ്ഥാപിച്ചു

തിരുവനന്തപുരം നഗരപരിധിയിൽ നാലു ദിവസമായി മുടങ്ങിയിരുന്ന കുടിവെള്ള വിതരണം ഭാഗികമായി പുനഃസ്ഥാപിച്ചു. ഇന്നലെ രാത്രി 10 മണിയോടെയാണ് നീണ്ട അറ്റകുറ്റപ്പണികൾ പൂർത്തിയാക്കിയത്. തുടർന്ന് പമ്പിംഗ് ആരംഭിച്ച് രണ്ടു മണിക്കൂറിനുള്ളിൽ താഴ്ന്ന പ്രദേശങ്ങളിൽ വെള്ളമെത്തി. ഇന്ന് ഉച്ചയോടെ എല്ലായിടങ്ങളിലും ജലവിതരണം പൂർണ്ണമായി പുനഃസ്ഥാപിക്കാൻ കഴിയുമെന്നാണ് പ്രതീക്ഷ.

തിരുവനന്തപുരം-നാഗർകോവിൽ റെയിൽപാത ഇരട്ടിപ്പിക്കൽ പദ്ധതിയുടെ ഭാഗമായാണ് ജലവിതരണം പ്രതിസന്ധിയിലായത്. പ്രധാന പൈപ്പ് ലൈൻ മാറ്റി സ്ഥാപിക്കേണ്ടതിനാൽ ഒരു ദിവസം മാത്രം ജലവിതരണം മുടങ്ങുമെന്നായിരുന്നു ആദ്യത്തെ അറിയിപ്പ്. എന്നാൽ നാലു ദിവസം വെള്ളം മുടങ്ങിയതോടെ നഗരവാസികൾ കടുത്ത പ്രതിസന്ധി നേരിട്ടു. വാട്ടർ അതോറിറ്റിയുടെ ഏകോപനമില്ലായ്മയാണ് പ്രശ്നത്തിന് കാരണമെന്ന് പരാതി ഉയർന്നു.

പ്രതിപക്ഷം ഈ വിഷയം രാഷ്ട്രീയമായി ഏറ്റെടുത്തിട്ടുണ്ട്. കൂടുതൽ രാഷ്ട്രീയ ആരോപണങ്ങളും പ്രത്യാരോപണങ്ങളും ഉയരുമെന്ന് പ്രതീക്ഷിക്കുന്നു. കുടിവെള്ള പ്രതിസന്ധിയുടെ പശ്ചാത്തലത്തിൽ നഗരസഭ പരിധിയിലെ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചു. അവസാന പരാതി പരിഹരിക്കുംവരെ നഗരസഭയുടെ നേതൃത്വത്തിൽ ടാങ്കറിൽ വെള്ളമെത്തിക്കുമെന്ന് മേയർ ആര്യ രാജേന്ദ്രൻ വ്യക്തമാക്കിയിരുന്നു.

Story Highlights: Water supply partially restored in Thiruvananthapuram after four-day disruption