കേരള ബെവ്കോ മദ്യം ലക്ഷദ്വീപിലേക്ക്: സർക്കാർ അനുമതി നൽകി

കേരളത്തിലെ ബെവ്കോ മദ്യം ഇനി ലക്ഷദ്വീപിലേക്കും എത്തും. ബെഗാരം ദ്വീപിൽ ടൂറിസ്റ്റുകൾക്കായി മദ്യവിൽപ്പന നടത്താൻ സംസ്ഥാന സർക്കാർ ബെവ്ക്കോയ്ക്ക് അനുമതി നൽകി ഉത്തരവിറക്കി. ലക്ഷദ്വീപ് ഭരണകൂടം സംസ്ഥാന എക്‌സൈസ്‌ വകുപ്പിനെ സമീപിച്ച് കൊച്ചി-ബേപ്പൂർ തുറമുഖങ്ങളിൽ നിന്ന് വലിയ തോതിൽ മദ്യം വാങ്ങാനുള്ള അനുമതി തേടിയിരുന്നു.

എക്സൈസ് കമ്മീഷണർ ലക്ഷദ്വീപ് അഡ്മിനിസ്ട്രേഷനുമായി ചർച്ച നടത്തിയ ശേഷം, ബെവ്ക്കോയ്ക്ക് വലിയ വരുമാനമുണ്ടാക്കുന്ന കച്ചവടമായതിനാൽ അനുമതി ആവശ്യപ്പെട്ട് സർക്കാരിന് കത്തു നൽകി. ആദ്യമായാണ് ഒരു കേന്ദ്രഭരണ പ്രദേശം കേരളത്തിൽ നിന്ന് ഇത്രയും വലിയ തോതിൽ മദ്യം വാങ്ങുന്നത്. അബ്കാരി ചട്ടപ്രകാരം ബെവ്ക്കോ വെയർഹൗസിൽ നിന്ന് മറ്റൊരു സംസ്ഥാനത്തേക്കോ കേന്ദ്രഭരണ പ്രദേശത്തേക്കോ നേരിട്ട് മദ്യവിൽപ്പന നടത്താൻ അനുമതിയില്ലാത്തതിനാൽ സർക്കാരിന്റെ പ്രത്യേക ഉത്തരവ് ആവശ്യമായിരുന്നു.

സർക്കാർ എക്സൈസ് കമ്മീഷണറുടെ അപേക്ഷ പരിഗണിച്ച് ഒറ്റത്തവണയായി ലക്ഷദ്വീപിലേക്ക് മദ്യവിൽപ്പന നടത്താൻ ബെവ്ക്കോയ്ക്ക് അനുമതി നൽകി. ഇനി ലക്ഷദ്വീപ് ഭരണകൂടം ഏതൊക്കെ ബ്രാൻഡ് വേണം, എത്ര രൂപയ്ക്ക് മദ്യം വേണമെന്ന് ആവശ്യപ്പെട്ട് പ്രത്യേക അപേക്ഷ ബെവ്കോ എംഡിക്ക് നൽകണം. കൂടാതെ, മദ്യം അതിർത്തി കടത്തി കൊണ്ടുപോകാൻ എക്സൈസിന്റെ പ്രത്യേക അനുമതിയും ആവശ്യമാണ്. ഈ നടപടികൾ പൂർത്തിയാക്കിയാൽ കോഴിക്കോട്, കൊച്ചി വെയർഹൗസുകളിൽ നിന്നും മദ്യം നൽകും.

Story Highlights: Kerala Bevco to export liquor to Lakshadweep for tourist consumption