Kerala News
നടി ആക്രമിക്കപ്പെട്ട കേസ്: വിധി തീയതി ഇന്ന് തീരുമാനിക്കും
കൊച്ചിയിൽ നടി ആക്രമിക്കപ്പെട്ട കേസിൽ വിധി പറയാനുള്ള തീയതി ഇന്ന് വിചാരണ കോടതി തീരുമാനിച്ചേക്കും. നടൻ ദിലീപ് ഉൾപ്പെടെ 14 പ്രതികളുള്ള കേസിൽ എറണാകുളം പ്രിൻസിപ്പൽ സെഷൻസ് കോടതി ജഡ്ജിയാണ് വിധി പറയുന്നത്. 2017 ഫെബ്രുവരിയിൽ കൊച്ചിയിൽ വെച്ച് നടിയെ തട്ടിക്കൊണ്ടുപോയി ലൈംഗികമായി പീഡിപ്പിച്ച കേസിൽ ദിലീപിനെതിരെ ക്രിമിനൽ ഗൂഢാലോചന നടത്തിയെന്നാണ് ആരോപണം.
ഐഎസിൽ ചേർക്കാൻ പ്രേരിപ്പിച്ച കേസ്: കുട്ടിയുടെ മാതാവ് പൊലീസ് നിരീക്ഷണത്തിൽ
തിരുവനന്തപുരം വെഞ്ഞാറമൂടിൽ 16-കാരനെ ഐഎസിൽ ചേർക്കാൻ പ്രേരിപ്പിച്ച കേസിൽ കുട്ടിയുടെ മാതാവ് പൊലീസ് നിരീക്ഷണത്തിൽ. യുകെയിൽ നഴ്സായി ജോലി ചെയ്യുന്ന യുവതി രണ്ടാഴ്ച മുമ്പാണ് കേരളത്തിലെത്തിയത്. ഇവരുടെ ആണ്സുഹൃത്തിന്റെ സഹോദരനും സംശയനിഴലിലുണ്ട്. കനകമല കേസിലെ പ്രതിയാണ് ഇയാളെന്നും പൊലീസ് പറയുന്നു.
കല്ലായിൽ സ്ഥാനാർത്ഥിയില്ലാതെ കോൺഗ്രസ്; വി.എം. വിനുവിന് പകരക്കാരനില്ല, ബൈജു സ്ഥാനാർത്ഥി
കല്ലായിൽ വി.എം. വിനുവിന് പകരക്കാരനായി പൊതുസമ്മതനായ സ്ഥാനാർത്ഥിയെ കണ്ടെത്താൻ കോൺഗ്രസിന് കഴിഞ്ഞില്ല. എഴുത്തുകാരൻ യു.കെ. കുമാരൻ മത്സരത്തിനില്ലെന്ന് അറിയിച്ചതോടെ കോൺഗ്രസ് പ്രതിസന്ധിയിലായി. കോൺഗ്രസ് മണ്ഡലം പ്രസിഡന്റ് കാളകണ്ടി ബൈജുവിനെ സ്ഥാനാർത്ഥിയാക്കാൻ ധാരണയായി, ഇന്ന് പ്രഖ്യാപിക്കും.
ഇടുക്കി വാഴത്തോപ്പ് അപകടം: ഡ്രൈവർ അറസ്റ്റിൽ, സംസ്കാരം ഇന്ന്
ഇടുക്കി വാഴത്തോപ്പ് ഗിരിജ്യോതി പബ്ലിക് സ്കൂളിലെ പ്ലേ സ്കൂൾ വിദ്യാർത്ഥി ബസ് കയറി മരിച്ച സംഭവത്തിൽ ഡ്രൈവർ അറസ്റ്റിൽ. മനഃപൂർവമല്ലാത്ത നരഹത്യ, അപകടകരമായും, അശ്രദ്ധമായും വാഹനമോടിക്കൽ എന്നീ വകുപ്പുകളാണ് ഡ്രൈവർക്കെതിരെ ചുമത്തിയിരിക്കുന്നത്. തടിയമ്പാട് സ്വദേശി ബെൻ ജോണ്സൻ്റെ മകൾ നാലു വയസുകാരി ഹെയ്സല് ബെൻ ആണ് മരിച്ചത്.
കൊല്ലത്ത് ഫ്ലെക്സ് ബോർഡ് സ്ഥാപിക്കുന്നതിനെ ചൊല്ലി ബിജെപി-സിപിഐഎം സംഘർഷം; ബിജെപി പ്രവർത്തകന് വെട്ടേറ്റു
കൊല്ലം പുനലൂരിൽ ഫ്ലെക്സ് ബോർഡ് സ്ഥാപിക്കുന്നതിനെ ചൊല്ലിയുണ്ടായ സംഘർഷത്തിൽ ബിജെപി പ്രവർത്തകന് വെട്ടേറ്റു. ബിജെപി സ്ഥാനാർത്ഥിയെ ആക്രമിക്കാൻ ശ്രമിച്ചതാണ് കാരണമെന്ന് ബിജെപി ആരോപിക്കുന്നു. അതേസമയം, സിപിഐഎം സ്ഥാപിച്ചിരുന്ന ഫ്ലെക്സ് ബോർഡിന്റെ സ്ഥലത്ത് തന്നെ ബിജെപി പ്രവർത്തകർ ഫ്ലെക്സ് സ്ഥാപിച്ചതാണ് പ്രശ്നങ്ങൾക്ക് കാരണമെന്ന് സിപിഐഎം ആരോപിക്കുന്നു.
വിമത സ്ഥാനാർത്ഥിയായ കെ.ശ്രീകണ്ഠനെ സി.പി.ഐ.എം പുറത്താക്കി
തിരുവനന്തപുരം കോർപ്പറേഷനിൽ വിമത സ്ഥാനാർത്ഥിയായി മത്സരിക്കുന്ന കെ. ശ്രീകണ്ഠനെ സി.പി.ഐ.എം പാർട്ടിയിൽ നിന്ന് പുറത്താക്കി. പാർട്ടി സ്ഥാനാർത്ഥിക്കെതിരെ മത്സരിക്കാൻ തീരുമാനിച്ചതിന് പിന്നാലെയാണ് നടപടി. ദേശാഭിമാനി തിരുവനന്തപുരം മുൻ ബ്യൂറോ ചീഫ് കൂടിയാണ് പുറത്താക്കപ്പെട്ട കെ. ശ്രീകണ്ഠൻ.
ഹൈക്കോടതി വിധിയിൽ പ്രതികരണവുമായി വി.എം.വിനു; സിനിമയിലേക്ക് മടങ്ങാനൊരുങ്ങുന്നു
വോട്ടർ പട്ടികയിൽ പേരില്ലാത്തതിനെ ചോദ്യം ചെയ്തുള്ള ഹർജി ഹൈക്കോടതി തള്ളിയതിനെ തുടർന്ന് പ്രതികരണവുമായി വി.എം.വിനു. ഹൈക്കോടതിയുടെ വിധിയിൽ തനിക്ക് മനപ്രയാസമില്ലെന്നും അദ്ദേഹം പറഞ്ഞു. തിരഞ്ഞെടുപ്പിൽ മത്സരിക്കാൻ കഴിയില്ലെന്ന് ഉറപ്പായതോടെ കോൺഗ്രസ് നേതൃത്വം പുതിയ സ്ഥാനാർത്ഥിക്കായുള്ള ചർച്ചകൾ ആരംഭിച്ചു.
എസ്. സുരേഷിനെതിരായ ആരോപണത്തിൽ പ്രതികരണവുമായി മഹിളാ മോർച്ച നേതാവ്
പെരിങ്ങമല ലേബർ കോൺട്രാക്ട് സഹകരണ സംഘം തട്ടിപ്പുമായി ബന്ധപ്പെട്ട് ഉയർന്ന ആരോപണങ്ങളിൽ എസ്. സുരേഷിനെതിരെ മഹിളാ മോർച്ച നേതാവ് രംഗത്ത്. തനിക്കെതിരായ ആരോപണം ബിജെപി മുന്നേറ്റം തടയാനുള്ള ശ്രമമാണെന്ന് സുരേഷ് ആരോപിച്ചു. എന്നാൽ, വ്യക്തിപരമായ വിഷയങ്ങളിൽ പാർട്ടിയെ വലിച്ചിഴക്കേണ്ടതില്ലെന്ന് സ്മിത ലക്ഷ്മി പ്രതികരിച്ചു.
വി.എം. വിനുവിന് തിരിച്ചടി; യുഡിഎഫ് സ്ഥാനാർത്ഥിത്വം ഹൈക്കോടതി തള്ളി
കോഴിക്കോട് കോർപ്പറേഷനിൽ യുഡിഎഫ് സ്ഥാനാർത്ഥിയാകാൻ വി.എം. വിനുവിന് കഴിയില്ല. വോട്ടർ പട്ടികയിൽ പേരില്ലാത്തതിനെതിരായ ഹർജി ഹൈക്കോടതി തള്ളി. രാഷ്ട്രീയക്കാരും സാധാരണക്കാരും ഒരുപോലെയാണെന്നും കോടതി അറിയിച്ചു.
ശബരിമലയിലെ ദുരിതങ്ങൾക്ക് കാരണം സർക്കാരിന്റെ പിടിപ്പുകേട്; വിമർശനവുമായി വി.ഡി. സതീശൻ
ശബരിമലയിലെ സൗകര്യക്കുറവിനെതിരെ വി.ഡി. സതീശൻ സർക്കാരിനെ വിമർശിച്ചു. മണ്ഡലകാലത്തിന് മുന്നോടിയായി വേണ്ടത്ര തയ്യാറെടുപ്പുകൾ നടത്തിയില്ലെന്നും ആരോപിച്ചു. അടിയന്തരമായി ഇടപെട്ടില്ലെങ്കിൽ യുഡിഎഫ് പ്രതിനിധി സംഘം സന്ദർശിക്കുമെന്നും മുന്നറിയിപ്പ് നൽകി.
വെഞ്ഞാറമൂട്ടിൽ 16-കാരനെ ഐഎസിൽ ചേർക്കാൻ ശ്രമിച്ച സംഭവം: എൻഐഎയും അന്വേഷണത്തിന്
വെഞ്ഞാറമൂട്ടിൽ 16-കാരനെ ഐഎസിൽ ചേർക്കാൻ പ്രേരിപ്പിച്ച കേസിൽ എടിഎസ് അന്വേഷണം തുടങ്ങി. പ്രതികളായ അമ്മയും സുഹൃത്തും യുകെയിൽ ആയതിനാൽ നിയമോപദേശം തേടും. സംഭവത്തിൽ എൻഐഎയും വിവരശേഖരണം ആരംഭിച്ചു.
കേരളത്തിൽ സ്വർണ്ണവില കുതിച്ചുയരുന്നു; ഒരു പവന് 91,560 രൂപയായി
സംസ്ഥാനത്ത് സ്വര്ണ്ണവില കുതിച്ചുയര്ന്നു. ഇന്ന് ഗ്രാമിന് 110 രൂപയും പവന് 880 രൂപയും വര്ധിച്ചു. ഇതോടെ ഒരു പവന് സ്വര്ണ്ണത്തിന്റെ വില 91,560 രൂപയായി. രാജ്യാന്തര വിപണിയിലെ മാറ്റങ്ങള് സ്വര്ണ്ണവിലയില് പ്രതിഫലിക്കുന്നു.