Kerala News
മുഖ്യമന്ത്രിയുടെ മകനായതുകൊണ്ടാണ് വിവേക് കിരണിനെ വേട്ടയാടുന്നതെന്ന് ഇ.പി. ജയരാജൻ
മുഖ്യമന്ത്രിയുടെ മകനായതുകൊണ്ടാണ് വിവേക് കിരണിനെ അനാവശ്യമായി വേട്ടയാടുന്നതെന്ന് ഇ.പി. ജയരാജൻ പറഞ്ഞു. ലാവ്ലിൻ കേസ് നടക്കുമ്പോൾ മുഖ്യമന്ത്രിയുടെ മകന് 11 വയസ്സ് മാത്രമായിരുന്നു പ്രായം. പേരാമ്പ്ര സംഘർഷത്തിൽ കെ.സി. വേണുഗോപാലിനെയും ഷാഫി പറമ്പിലിനെയും ഇ.പി. ജയരാജൻ വിമർശിച്ചു.
ആർഎസ്എസ് പീഡനം: അനന്തു അജിയുടെ ആത്മഹത്യാക്കുറിപ്പ് പുറത്ത്; വീഡിയോ സന്ദേശവും
ആർഎസ്എസ് പ്രവർത്തകന്റെ ലൈംഗിക പീഡനം കാരണം മനംനൊന്ത് ആത്മഹത്യ ചെയ്ത അനന്തു അജിയുടെ ഇൻസ്റ്റഗ്രാം വീഡിയോ പുറത്ത്. താൻ ഒരു ലൈംഗികാതിക്രമത്തിന് ഇരയാണെന്നും, തന്നെ പീഡിപ്പിച്ചയാൾ വിവാഹം കഴിഞ്ഞ് സന്തോഷത്തോടെ ജീവിക്കുന്നുവെന്നും അനന്തു വീഡിയോയിൽ പറയുന്നു. ഈ ആത്മഹത്യയുമായി ബന്ധപ്പെട്ട് യൂത്ത് കോൺഗ്രസും, ഡി.വൈ.എഫ്.ഐയും കാഞ്ഞിരപ്പള്ളി ഡിവൈ.എസ്.പിക്ക് അന്വേഷണം ആവശ്യപ്പെട്ട് പരാതി നൽകിയിട്ടുണ്ട്.
സ്കൂളിൽ ഒന്നാം ക്ലാസ് വിദ്യാർത്ഥിയെ തെരുവ് നായ കടിച്ചു; കിളിമാനൂരിലാണ് സംഭവം
തിരുവനന്തപുരം കിളിമാനൂർ ഗവ. എൽപി സ്കൂളിൽ ഒന്നാം ക്ലാസ് വിദ്യാർത്ഥിക്ക് തെരുവ് നായയുടെ കടിയേറ്റു. സ്കൂളിൽ കലോത്സവം നടക്കുന്നതിനിടെ ഉച്ചഭക്ഷണ സമയത്താണ് സംഭവം നടന്നത്. കുട്ടിയുടെ ആരോഗ്യനില തൃപ്തികരമാണെന്ന് അധികൃതർ അറിയിച്ചു.
എറണാകുളത്ത് വോട്ട് ചോർച്ചയുണ്ടായെന്ന് ഡിസിസി പ്രസിഡന്റ്; തിരഞ്ഞെടുപ്പ് കമ്മീഷന് പരാതി നൽകി
എറണാകുളത്ത് 6557 ഇരട്ട വോട്ടുകൾ നടന്നതായി ഡിസിസി പ്രസിഡന്റ് മുഹമ്മദ് ഷിയാസ് ആരോപിച്ചു. ഇത് സംബന്ധിച്ച് അദ്ദേഹം തിരഞ്ഞെടുപ്പ് കമ്മീഷന് പരാതി നൽകി. 27 തദ്ദേശ സ്ഥാപനങ്ങളിലാണ് ഇരട്ട വോട്ടുകൾ കണ്ടെത്തിയത്.
ഭിന്നശേഷി അധ്യാപക നിയമനം: സർക്കാരിനെതിരെ വിമർശനവുമായി ഓർത്തഡോക്സ് സഭാ അധ്യക്ഷൻ
ഭിന്നശേഷി അധ്യാപക നിയമനത്തിൽ സർക്കാരിനെതിരെ വിമർശനവുമായി ഓർത്തഡോക്സ് സഭാ അധ്യക്ഷൻ ബസേലിയോസ് മാർത്തോമ്മാ മാത്യൂസ് തൃതീയൻ രംഗത്ത്. എൻഎസ്എസിന് ലഭിച്ച വിധി ക്രൈസ്തവ സഭയ്ക്കും ബാധകമാണെന്ന് ഉത്തരവ് ഇറക്കാൻ സർക്കാർ മടിക്കേണ്ടതില്ലെന്ന് അദ്ദേഹം പറഞ്ഞു. ക്രൈസ്തവരെ ബാധിക്കുന്ന പ്രശ്നങ്ങളിൽ ഒന്നിച്ച് നിൽക്കുമെന്നും വിവിധ ക്രൈസ്തവ സഭകളുടെ യോഗത്തിന് ശേഷം അദ്ദേഹം കൂട്ടിച്ചേർത്തു.
കെ ജെ ഷൈനെതിരായ സൈബർ അധിക്ഷേപം: സി കെ ഗോപാലകൃഷ്ണൻ അറസ്റ്റിൽ
കെ ജെ ഷൈനെതിരായ സൈബർ അധിക്ഷേപ കേസിൽ സി കെ ഗോപാലകൃഷ്ണനെ എറണാകുളം റൂറൽ സൈബർ പൊലീസ് അറസ്റ്റ് ചെയ്തു. കോടതി നിർദേശപ്രകാരം അറസ്റ്റ് ചെയ്ത ശേഷം സ്റ്റേഷൻ ജാമ്യത്തിൽ വിട്ടയച്ചു. കേസിൽ ഒന്നാം പ്രതിയാണ് ഗോപാലകൃഷ്ണൻ.
കല്ലിയൂർ പുന്നമൂട് സ്കൂളിൽ വിദ്യാർത്ഥിയുടെ പെപ്പർ സ്പ്രേ ആക്രമണം; അധ്യാപികയ്ക്ക് ഗുരുതര പരിക്ക്, 3 വിദ്യാർത്ഥികൾ നിരീക്ഷണത്തിൽ
തിരുവനന്തപുരം കല്ലിയൂർ പുന്നമൂട് സ്കൂളിൽ വിദ്യാർത്ഥിയുടെ പെപ്പർ സ്പ്രേ ആക്രമണം. സംഭവത്തിൽ 6 പ്ലസ് ടു വിദ്യാർഥികൾക്കും ഒരു അധ്യാപികയ്ക്കും ശാരീരിക ബുദ്ധിമുട്ടുണ്ടായി. ഇവരെ തിരുവനന്തപുരം മെഡിക്കൽ കോളജ് ആശുപത്രിയിലേക്ക് മാറ്റി. മൂന്ന് വിദ്യാർഥികളുടെ ആരോഗ്യനില മോശമാണെന്ന് ആശുപത്രി അധികൃതർ അറിയിച്ചു.
ശബരിമല സ്വർണപ്പാളി കേസ്: സന്ദീപ് വാര്യർക്ക് ജാമ്യം
ശബരിമല സ്വർണപ്പാളി വിഷയത്തിൽ യൂത്ത് കോൺഗ്രസ് നടത്തിയ മാർച്ചിലെ സംഘർഷവുമായി ബന്ധപ്പെട്ട് റിമാൻഡിലായിരുന്ന കോൺഗ്രസ് വക്താവ് സന്ദീപ് വാര്യർക്ക് ജാമ്യം ലഭിച്ചു. അദ്ദേഹത്തോടൊപ്പം റിമാൻഡിലായിരുന്ന യൂത്ത് കോൺഗ്രസ് പ്രവർത്തകർക്കും പത്തനംതിട്ട സിജെഎം കോടതി ജാമ്യം അനുവദിച്ചു. ഒൻപത് ദിവസത്തെ റിമാൻഡിന് ശേഷമാണ് ഇവർക്ക് ജാമ്യം ലഭിക്കുന്നത്.
പാലക്കാട് അഗളിയിൽ വൻ കഞ്ചാവ് വേട്ട; പതിനായിരത്തോളം കഞ്ചാവ് ചെടികൾ നശിപ്പിച്ചു
പാലക്കാട് അഗളിയിൽ സത്യക്കല്ലുമലയുടെ താഴ്വരത്തിൽ 60 സെന്റ് സ്ഥലത്ത് കൃഷി ചെയ്തിരുന്ന പതിനായിരത്തോളം കഞ്ചാവ് ചെടികൾ കണ്ടെത്തി നശിപ്പിച്ചു. കേരള തീവ്രവാദ വിരുദ്ധ സേനയും, പാലക്കാട് ജില്ല ലഹരി വിരുദ്ധ സേനയും, പുതുർ പൊലീസും സംയുക്തമായി നടത്തിയ റെയ്ഡിലാണ് കഞ്ചാവ് തോട്ടം കണ്ടെത്തിയത്. കൃഷി ചെയ്യുന്നവരെയും വില്പന നടത്തുന്നവരെയും കുറിച്ച് അന്വേഷണം നടക്കുകയാണെന്ന് അധികൃതർ അറിയിച്ചു.
കെനിയൻ മുൻ പ്രധാനമന്ത്രി റെയില ഒടുങ്കെ കേരളത്തിൽ അന്തരിച്ചു
കെനിയയുടെ മുൻ പ്രധാനമന്ത്രി റെയില ഒടുങ്കെ കേരളത്തിൽ അന്തരിച്ചു. വെള്ളിയാഴ്ച കൂത്താട്ടുകുളത്തെ ശ്രീധരീയം ആശുപത്രിയിൽ ചികിത്സ തേടിയെത്തിയ അദ്ദേഹം, പ്രഭാതനടത്തത്തിനിടെ കുഴഞ്ഞുവീണ് ദേവമാതാ ആശുപത്രിയിൽ വെച്ച് ഹൃദയാഘാതം മൂലം മരണമടഞ്ഞു. 2008 മുതൽ 2013 വരെ കെനിയയുടെ പ്രധാനമന്ത്രിയായിരുന്നു ഒടുങ്കെ.
പേരാമ്പ്ര കേസിൽ പൊലീസിനെതിരെ ഒ.ജെ. ജനീഷ്
പേരാമ്പ്രയിലെ കേസിൽ പൊലീസ് നടപടി അംഗീകരിക്കാനാവില്ലെന്ന് യൂത്ത് കോൺഗ്രസ് സംസ്ഥാന അധ്യക്ഷൻ ഒ ജെ ജനീഷ് അഭിപ്രായപ്പെട്ടു. സംഭവ സ്ഥലത്ത് ഇല്ലാതിരുന്ന യൂത്ത് കോൺഗ്രസ് പ്രവർത്തകരെ വരെ അറസ്റ്റ് ചെയ്തു. എല്ലാ കാലത്തും പിണറായി വിജയൻ മുഖ്യമന്ത്രിയായിരിക്കില്ലെന്നും ഇത് പോലീസ് മനസ്സിലാക്കണമെന്നും ജനീഷ് ആവശ്യപ്പെട്ടു.
നവീൻ ബാബുവിന്റെ മരണത്തിന് ഒരു വർഷം; നീതി അകലെയാണെന്ന് ഭാര്യ മഞ്ജുഷ
കണ്ണൂർ മുൻ എ.ഡി.എം നവീൻ ബാബുവിന്റെ ഒന്നാം ചരമവാർഷികത്തിൽ നീതി അകലെയാണെന്ന് ഭാര്യ മഞ്ജുഷ പ്രതികരിച്ചു. കേസിൽ പുനരന്വേഷണം ആവശ്യപ്പെട്ട് കുടുംബം കോടതിയെ സമീപിച്ചിട്ടുണ്ട്. രാഷ്ട്രീയ കേരളത്തിൽ ഏറെ കോളിളക്കമുണ്ടാക്കിയ സംഭവമായിരുന്നു കെ. നവീൻ ബാബുവിൻ്റെ ആത്മഹത്യ.