Kerala News
കൊല്ലം ചിറ്റുമലയിൽ സിപിഐ നേതാക്കൾക്കെതിരെ ജാതി അധിക്ഷേപ കേസ്
കൊല്ലം ചിറ്റുമലയിൽ മതില് കെട്ടുന്നതുമായി ബന്ധപെട്ടുണ്ടായ തർക്കത്തിൽ സി.പി.ഐ മണ്ഡലം സെക്രട്ടറി ഉൾപ്പെടെ 9 പേർക്കെതിരെ കേസ്. കെപിഎംഎസ് നേതാവിൻ്റെ വീട്ടിൽ മതില് കെട്ടുന്നതുമായി ബന്ധപെട്ടുണ്ടായ തർക്കമാണ് കേസിനാധാരം. സി.പി.ഐ നേതാക്കൾ വീട്ടിലെ സ്ത്രീയെ ജാതിപ്പേര് വിളിച്ച് ആക്ഷേപിച്ചുവെന്നാണ് പരാതി.
ചെളി തെറിപ്പിച്ചത് ചോദ്യം ചെയ്തതിന് കെഎസ്ആർടിസി ജീവനക്കാർ ബസ് നടുറോഡിലിട്ട് പോയി
ആലപ്പുഴ അരൂരിൽ ചെളി തെറിപ്പിച്ചതുമായി ബന്ധപ്പെട്ട തർക്കത്തെ തുടർന്ന് കെഎസ്ആർടിസി ജീവനക്കാർ ബസ് നടുറോഡിൽ ഉപേക്ഷിച്ച് പോയി. കോഴിക്കോട് - തിരുവനന്തപുരം സൂപ്പർ ഫാസ്റ്റ് ബസ്സാണ് ജീവനക്കാർ ഉപേക്ഷിച്ചത്. സംഭവത്തെ തുടർന്ന് മണിക്കൂറുകളോളം ഗതാഗതം തടസ്സപ്പെട്ടു, യാത്രക്കാരും നാട്ടുകാരും പ്രതിഷേധിച്ചു.
എ.കെ.ജി പഠന കേന്ദ്രത്തിന് ഭൂമി അനുവദിച്ചതിൽ ഗവർണർ ഇടപെടില്ല; തുടർനടപടി വേണ്ടെന്ന് നിർദേശം
എ.കെ.ജി പഠന ഗവേഷണ കേന്ദ്രത്തിന് ഭൂമി അനുവദിച്ചതുമായി ബന്ധപ്പെട്ട പരാതിയിൽ ഗവർണർ രാജേന്ദ്ര ആർലേക്കർ തുടർനടപടികൾ വേണ്ടെന്ന് നിർദ്ദേശം നൽകി. തണ്ടപ്പേർ രജിസ്റ്റർ പ്രകാരം ഇത് പുറമ്പോക്ക് ഭൂമിയാണെന്ന വഞ്ചിയൂർ വില്ലേജ് ഓഫീസറുടെ മറുപടി പുറത്തുവന്നതോടെയാണ് വിവാദം ഉയർന്നത്. സർവ്വകലാശാലയുടെ ഭൂമി കയ്യേറിയെന്ന പരാതിയിൽ ഗൗരവമായ ഇടപെടൽ നടത്തേണ്ടതില്ലെന്നാണ് ഗവർണറുടെ നിലപാട്.
എസ്.സി.-എസ്.ടി. ഫണ്ട് തട്ടിപ്പ്: നഗരസഭയുടെ പരാതിയിൽ അന്വേഷണം, രാഷ്ട്രീയം നോക്കാതെ നടപടിയെന്ന് മേയർ
തിരുവനന്തപുരം നഗരസഭയിലെ എസ്.സി.-എസ്.ടി. ഫണ്ട് തട്ടിപ്പ് കേസിൽ 14 പേർ അറസ്റ്റിലായി. നഗരസഭയുടെ പരാതിയിലാണ് അന്വേഷണം നടക്കുന്നതെന്ന് മേയർ ആര്യാ രാജേന്ദ്രൻ അറിയിച്ചു. അഴിമതിക്കെതിരായ പോരാട്ടം തുടരുമെന്നും, അഴിമതി നടത്തുന്ന ആരെയും സംരക്ഷിക്കില്ലെന്നും അവർ വ്യക്തമാക്കി. കക്ഷിരാഷ്ട്രീയം പരിഗണിക്കാതെ ശക്തമായ നടപടികളുമായി മുന്നോട്ട് പോകുമെന്നും മേയർ കൂട്ടിച്ചേർത്തു.
ഡിജിറ്റൽ സാങ്കേതിക സർവകലാശാല വിസിമാരെ തുടരാൻ അനുമതി; ഗവർണറുടെ പുതിയ വിജ്ഞാപനം
ഡിജിറ്റൽ സാങ്കേതിക സർവകലാശാലകളിലെ താൽക്കാലിക വൈസ് ചാൻസലർമാരെ തുടരാൻ അനുവദിച്ച് ഗവർണർ വിജ്ഞാപനം ഇറക്കി. സുപ്രീം കോടതിയുടെ ഉത്തരവിന്റെ പശ്ചാത്തലത്തിലാണ് ചാൻസിലറായ ഗവർണർ രാജേന്ദ്ര ആർലേക്കർ പുതിയ വിജ്ഞാപനം ഇറക്കിയത്. ഇതിന്റെ പശ്ചാത്തലത്തിൽ ഡിജിറ്റൽ സർവകലാശാലയിൽ ഡോ. സിസാ തോമസും സാങ്കേതിക സർവകലാശാലയിൽ ഡോ. കെ ശിവപ്രസാദും വി സിമാരായി തുടരും.
സ്വർണ്ണവില വീണ്ടും കുറഞ്ഞു; പുതിയ വില അറിയാം
സംസ്ഥാനത്ത് സ്വര്ണവില വീണ്ടും കുറഞ്ഞു. ഗ്രാമിന് 20 രൂപയുടെ ഇടിവാണ് ഉണ്ടായിരിക്കുന്നത്. ഇതോടെ സംസ്ഥാനത്ത് ഒരു പവന് സ്വര്ണത്തിന്റെ വില 73200 രൂപയായി. ഡോളര് പിടിച്ചുനില്ക്കുന്നതാണ് വിലയില് ഇടിവുണ്ടാക്കിയിരിക്കുന്നത്.
മെഡിക്കൽ കോളജിൽ ശസ്ത്രക്രിയാ ഉപകരണം കാണാനില്ല; അന്വേഷണം ആവശ്യപ്പെട്ട് ആരോഗ്യവകുപ്പ്
തിരുവനന്തപുരം മെഡിക്കൽ കോളജിലെ യൂറോളജി വിഭാഗത്തിൽ നിന്ന് ശസ്ത്രക്രിയാ ഉപകരണം കാണാതായെന്ന് ആരോഗ്യവകുപ്പ്. 20 ലക്ഷത്തോളം രൂപ വിലമതിക്കുന്ന മോസിലോസ്കോപ്പ് എന്ന ഉപകരണമാണ് കാണാതായത്. ഉപകരണങ്ങൾ മനഃപൂർവം കേടാക്കിയെന്നും കണ്ടെത്തലുണ്ട്.
കൊല്ലത്ത് ഭാര്യയെ കുത്തിക്കൊന്ന് ഭർത്താവ്; സംഭവം അഞ്ചാലുംമൂട് താന്നിക്കമുക്കിൽ
കൊല്ലം അഞ്ചാലുംമൂട് താന്നിക്കമുക്കിൽ ഭർത്താവ് ഭാര്യയെ കുത്തിക്കൊന്നു. കല്ലുവാതുക്കൽ ജിഷാ ഭവനിൽ രേവതിയാണ് മരിച്ചത്. രേവതി ജോലിക്ക് നിന്ന വീട്ടിൽ അതിക്രമിച്ച് കയറിയാണ് ഭർത്താവ് ജിനു കൊല നടത്തിയത്.
അതിരപ്പിള്ളി മലക്കപ്പാറയില് നാല് വയസുകാരനെ പുലി ആക്രമിച്ചു
തൃശൂർ അതിരപ്പിള്ളി മലക്കപ്പാറയിൽ നാല് വയസ്സുകാരനെ പുലി ആക്രമിച്ചു. വീട്ടിൽ ഉറങ്ങിക്കിടന്ന കുട്ടിയെ പുലി കടിച്ചു വലിച്ചു കൊണ്ടുപോകുവാൻ ശ്രമിച്ചു. കുട്ടിയുടെ തലയിലും കഴുത്തിലും പരുക്കുകളുണ്ട്.
കൊടി സുനിക്ക് മദ്യം വാങ്ങി നൽകിയ മൂന്ന് പൊലീസുകാർക്ക് സസ്പെൻഷൻ
കൊലക്കേസ് പ്രതിയായ കൊടി സുനിക്ക് ജയിലിൽ നിന്ന് കോടതിയിലേക്ക് പോകുമ്പോൾ മദ്യം വാങ്ങി നൽകിയ മൂന്ന് പൊലീസുകാരെ സസ്പെൻഡ് ചെയ്തു. തലശ്ശേരി കോടതിയിൽ നിന്ന് വരുന്ന വഴി ടി.പി. വധക്കേസ് പ്രതികളായ കൊടി സുനിക്കും ഷാഫിക്കും പൊലീസുകാർ മദ്യം വാങ്ങി നൽകുകയായിരുന്നു. കണ്ണൂർ സിറ്റി പൊലീസ് കമ്മീഷണറാണ് പ്രതികൾക്ക് എസ്കോർട്ട് പോയ ജില്ലാ ഹെഡ് ക്വാർട്ടേഴ്സിലെ മൂന്ന് പൊലീസുകാരെയും സസ്പെൻഡ് ചെയ്തത്.
ആലപ്പുഴയിൽ യുവാക്കളുടെ സംഘർഷം; ഒരാൾക്ക് കുത്തേറ്റു, രണ്ടുപേർ കസ്റ്റഡിയിൽ
ആലപ്പുഴ നഗരമധ്യത്തിൽ കെഎസ്ആർടിസി ബസ് സ്റ്റാൻഡിന് മുന്നിൽ യുവാവിന് കുത്തേറ്റു. സോഷ്യൽ മീഡിയ വഴിയുണ്ടായ തർക്കം പരിഹരിക്കുന്നതിനിടെയാണ് സംഭവം. സംഭവത്തിൽ രണ്ട് പേരെ പോലീസ് കസ്റ്റഡിയിലെടുത്തു.
മെഡിക്കൽ കോളജിൽ പ്രോബ് ഇല്ലെന്ന് പറഞ്ഞ സംഭവം; കാരണം കാണിക്കൽ നോട്ടീസിനോട് പ്രതികരിച്ച് ഡോക്ടർ ഹാരിസ് ഹസൻ
തിരുവനന്തപുരം മെഡിക്കൽ കോളേജിൽ ശസ്ത്രക്രിയാ ഉപകരണങ്ങളുടെ കുറവ് പരസ്യമായി പറഞ്ഞതിന് കാരണം കാണിക്കൽ നോട്ടീസ് ലഭിച്ച സംഭവത്തിൽ ഡോക്ടർ ഹാരിസ് ഹസൻ പ്രതികരിക്കുന്നു. തനിക്ക് കാരണം കാണിക്കൽ നോട്ടീസ് ലഭിച്ചിട്ടുണ്ട് എന്നും ഇതിന് വിശദീകരണം നൽകുമെന്നും ഡോക്ടർ ഹാരിസ് ചിറക്കൽ അറിയിച്ചു. ഇത് സർക്കാരിന്റെ പ്രതികാര നടപടിയാണെന്നും റിപ്പോർട്ട് വ്യാജമാകാൻ സാധ്യതയുണ്ടെന്നും അല്ലെങ്കിൽ അതിലെ നോട്ടീസ് വ്യാജമായിരിക്കുമെന്നും അദ്ദേഹം മാധ്യമങ്ങളോട് പറഞ്ഞു.\n